Breaking News
सिडको करणार मानखुर्द ते नवी मुंबई मेट्रोचे काम
नवी मुंबई : छत्रपती शिवाजी महाराज आंतरराष्ट्रीय विमानतळापासून मानखुर्द पर्यंत येणारी मुंबईची मेट्रो क्रं.8 आता नवी मुंबईतील बेलापूर ते पेंधर दरम्यानच्या मेट्रो लाईन 1ला जोडली जाणार आहे. त्यानंतर हिच मेट्रो लाईन नवी मुंबई आंतरराष्ट्रीय विमानतळाला जोडली जाणार आहे. त्यामुळे मुंबई विमानतळापासून नवी मुंबई विमानतळापर्यंत थेट मेट्रो सेवा उपलब्ध होणार आहे. मानखुर्द ते बेलापूर या दहा किलोमीटर मेट्रो मार्गाची सिडको उभारणी करणार आहे.
छत्रपती शिवाजी महाराज आंतरराष्ट्रीय विमानतळ ते मानखुर्द दरम्यानच्या 11 किलोमीटर लांबीच्या मेट्रो क्रं. आठ चे काम एमएमआरडीने हाती घेतले आहे. छत्रपती शिवाजी महाराज टर्मिनस ते मानखुर्द या 11 किलोमीटर अंतराच्या मेट्रो मार्गानंतर मानखुर्द ते वाशी, सानपाडा, जुईनगर, नेरुळ आणि बेलापूरपर्यंतच्या मेट्रो मार्गाची उभारणी आता सिडको करणार असून शासनाने या मार्गाच्या कामाला हिरवा कंदील दाखवल्याचे सिडकोचे व्यवस्थापकीय संचालक डॉ.संजय मुखर्जी यांनी ट्वीट केले आहे. त्यामुळे मुंबई विमानतळापासून नवी मुंबई विमानतळापर्यंत थेट मेट्रो सेवा उपलब्ध होणार आहे.
राज्य शासनाने सिडकोच्या मानखुर्दपर्यंतच्या मेट्रो मार्गाच्या प्रस्तावाला मंजुरीही दिली आहे. त्यानुसार या प्रकल्पाचा विकास आराखडा तयार करण्यासाठी सिडकोने अर्बन मास ट्रान्सिट कंपनीची सल्लागार म्हणून नियुक्ती केली आहे. पुढील पाच महिन्यांत ही कंपनी आपला अहवाल सादर करणार असल्याचे सिडकोचे व्यवस्थापकीय संचालक डॉ. संजय मुखर्जी यांनी स्पष्ट केले आहे. बेलापूर ते मानखुर्द हा मार्ग 14 किलोमीटर लांबीचा असून, तो थेट नवी मुंबई आंतरराष्ट्रीय विमानतळाला जोडला जाणार आहे. या मार्गावर नवी मुंबईत वाशी, सानपाडा, जुईनगर आणि सागरसंगम अशी स्थानके असणार आहेत; तर दक्षिण नवी मुंबईतील खांदेश्वर येथून आंतरराष्ट्रीय विमानतळाला मेट्रोची जोड दिली जाणार आहे. त्यामुळे मुंबई आंतरराष्ट्रीय विमानतळ ते नवी मुंबई आंतरराष्ट्रीय विमानतळ हा प्रवास अवघ्या 30 मिनिटांत पार करणे शक्य होणार आहे. प्रवाशांच्यादृष्टीने हे खूपच फायदेशीर ठरणार आहे.
दरम्यान, मानखुर्द ते बेलापूर पर्यंतची मेट्रो कनेक्टिव्हिटी जोडण्याकरिता डीपीआर बनवण्याचे काम युनिफाईड मेट्रोपॉलिटन ट्रान्सपोर्ट एजन्सी अर्थात (उमटा) या केंद्र सरकारच्या एजन्सीला देण्यात आले आहे. या मेट्रो मार्गाचा डीपीआर उपलब्ध झाल्यानंतरच या मेट्रो मार्गावर होणारा खर्च आणि त्यासाठी लागणारा कालावधी समजू शकणार आहे. विशेष म्हणजे या मेट्रो मार्गात वाशी खाडी येणार असल्याने खाडीवर मेट्रोसाठी स्वतंत्र पुलाची उभारणी करावी लागणार आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai