बहुउद्देशीय इमारतीची उपायुक्तांकडून पाहणी

by Aajchi Navi Mumbai
May 05, 2023
99

नवी मुंबई : नवी मुंबई महानगरपालिकेच्या वाशी सेक्टर 16 मधील कै. सौ. विमल धनाजी शिंदे बहुउद्देशीय इमारतीच्या नूतनीकरणाचे काम सुरू आहे. अनेक वर्षांपासून ही इमारत बंद अवस्थेत असल्यामुळे इमारतीची दूरवस्था झाली होती. विभागातील नागरिकांसाठी वाचनालय व विद्यार्थ्यांसाठी सुसज्ज अभ्यासिका असावी याकरिता गेल्या 7 वर्षांपासून येथील स्थानिक माजी नगरसेविका अंजली अजय वाळुंज पाठपुरावा करत होत्या. काही दिवसांपूर्वी विभागातील कामांमध्ये दुजाभाव होत असल्याचा आरोप करत अंजली अजय वाळुंज व विजय वाळुंज यांनी वाशीतील छत्रपती शिवाजी महाराज चौकामध्ये उपोषण केले होते. त्यावेळी महानगरपालिकेकडून विभागातील कामांना गती देण्याचे आश्वासन देण्यात आले होते. गुरुवारी महानगरपालिकेचे उपायुक्त डॉ. श्रीराम पवार, ग्रंथपाल वाघ, कनिष्ठ अभियंता सुतार तसेच संबंधित अधिकाऱ्यांनी या ठिकाणी भेट देऊन कामाची पाहणी केली. त्यामुळे इमारतीच्या डागडुजीनंतर लवकरच या ठिकाणी सुसज्ज असे वाचनालय व अभ्यासिका नागरिकांसाठी खुली होईल, असा विश्वास नागरिकांमधून व्यक्त होत आहे.