Breaking News
सुविधांच्या गुणवत्तेसह कालबध्दतेकडेही लक्ष देण्याचे निर्देश
नवी मुंबई ः पालिका आयुक्तांनी विभागप्रमुखांच्या विशेष बैठकीत प्रत्येक विभागामार्फत सुरु असलेल्या कामांचा व कार्यवाहीचा सविस्तर आढावा घेतला. यावेळी महापालिकेच्या वतीने नागरिकांना पुरविण्यात येणाऱ्या सेवा सुविधा उत्तम दर्जाच्या असण्याकडे विशेष लक्ष देतानाच त्यांची पूर्तता विहित वेळेत करण्याकडेही काटेकोर लक्ष देण्याचे निर्देश दिले.
महापालिका क्षेत्रात विविध ठिकाणी असलेली मार्केट्स कार्यान्वित करण्याची कार्यवाही सुरु असून त्याला गती देण्याचे निर्देश आयुक्तांनी यावेळी दिले. ओटले वाटपाचे काम नियोजनबध्द रितीने पूर्ण करावे व पावसाळयापूर्वी हे वाटप करुन नागरिकांची व विक्रेत्यांची सोय होईल याकडे विशेष लक्ष देण्याचे निर्देश आयुक्तांनी दिले. फेरीवाला धोरण होणे अत्यंत महत्वाचे असून त्याबाबतच्या कार्यवाहीला गती द्यावी असेही निर्देशीत केले. घणसोली येथील रात्र निवारा केंद्र कार्यान्वित करण्याच्या दृष्टीने प्रक्रिया लवकरात लवकर पूर्ण करावी तसेच कोपरखैरणे येथील केंद्राबाबतही निर्णय घ्यावा असे निर्देश दिले. सीवूड येथील जेष्ठ नागरिक निवारा केंद्र कार्यान्वित करण्याबाबतच्या कार्यवाहीला गती द्यावी व तेथील फर्निचरचे सुरु असलेले काम लवकरात लवकर पूर्ण करावे असेही आयुक्तांनी सूचित केले. सेक्टर 3 वाशी येथील बहुउद्देशीय इमारत लवकरात लवकर वापरात आणण्याच्या दृष्टीने कार्यवाहीच्या सूचना आयुक्तांनी केल्या. जून महिन्यात शाळा सुरु होण्यापूर्वी शाळा इमारतींची आवश्यक दुरूस्ती करण्याची सुरु असलेली स्थापत्य कामे 31 मे पर्यंत पूर्ण करावीत असेही आयुक्तांनी सूचित केले. यामध्ये कोपरी व जुहूगाव शाळांचे दुरुस्ती काम मोठे असल्याने त्याठिकाणी अधिक मनुष्यबळ लावून काम वेळेत पूर्ण करण्याच्या सूचना अभियांत्रिकी विभागाला दिल्या.
महापालिका अधिकारी, कर्मचारी यांचे वेतन बायोमॅट्रीक हजेरीनुसार व्हावे या अनुषंगाने तांत्रिक बाबी समजून घेत आयुक्तांनी वेतन देयकासोबत बायोमॅट्रीक हजेरीची प्रत प्रत्येक विभागाने प्रशासन व लेखा विभागाकडे दरमहा वेतन देयकासोबत सादर करावी असे निर्देश दिले. तसेच विभागप्रमुखांनी आपापल्या विभागातील अधिकारी, कर्मचारी यांच्या कार्यालयातील आगमन निर्गमन वेळेवर नियंत्रण ठेवावे व त्यांच्या उपस्थितीचा अहवाल विभागप्रमुखांच्या पुढील बैठकीत सादर करावा असेही निर्देशीत केले. विदयार्थ्यांना महापालिकेच्या वतीने देण्यात येणाऱ्या शिष्यवृत्ती वितरणाच्या कार्यवाहीचा आढावा घेताना सन 2022-23 ची शिष्यवृत्ती जलद वितरीत करावी असे निर्देश आयुक्तांनी समाजविकास विभागास दिले. अर्थसंकल्पात जाहीर केलेल्या तृतीयपंथी व्यक्ती, शरीरविक्रय करणाऱ्या महिला, आदिवासी घटक, दिव्यांग व्यक्ती यांच्यासाठी नियोजन केलेल्या योजनांची व उपक्रमांची अंमलबजावणी करण्याच्या दृष्टीने तत्परतेने नियोजन करावे असेही आयुक्त राजेश नार्वेकर यांनी सूचित केले. कोपरखैरणे येथील ऑर्किड स्कुल हे त्यांच्या शाळा व्यवस्थापनाने अचानक बंद केल्याने 32 मुलांच्या शिक्षणाचा निर्माण झालेला प्रश्न सोडवणूकीसाठी व त्यांना इतर शाळांमध्ये प्रवेश मिळवून देण्यासाठी नवी मुंबई महानगरपालिका शिक्षण विभागाने पुढाकार घ्यावा असेही आयुक्तांनी निर्देशीत केले. युलू बाईकची वापर नियमावली तयार करावी व त्या ॲपमध्ये युलू वापरासाठी वयाचे बंधन असावे अशा प्रकारच्या कार्यवाहीसाठी तत्पर प्रयत्न व्हावेत असेही आयुक्तांनी निर्देशीत केले. केंद्र व राज्य सरकारच्या पीएमपोर्टल, सीएम पोर्टल, आपले सरकार अशा तक्रार निवारण प्रणालीच्या पोर्टलवर नवी मुंबई महानगरपालिकेशी संबधित तक्रारींमधील प्रलंबित तक्रारी तत्परतेने निकाली काढाव्यात असेही निर्देश आयुक्तांनी यावेळी दिले.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai