Breaking News
नवी मुंबई ः जागतिक पर्यावरण दिनाचे औचित्य साधून नवी मुंबई महापालिकेच्या वतीने पालिका आयुक्त राजेश नार्वेकर यांच्या मार्गदर्शनानुसार शहरात ठिकठिकाणी विविध उपक्रमांचे आयोजन करण्यात आले. यामध्ये विशेषत्वाने वाशी येथे कर्मवीर भाऊराव पाटील मॉडर्न महाविद्यालय येथे तृतीयपंथी संघटनेचे सदस्य, एनसीसी व एनएसएसचे विद्यार्थी तसेच लेट्स सेलिब्रेट फिटनेस संस्थेचे सदस्य यांनी एकत्र येत माझी वसुंधरा अभियानाची सामुहिक शपथ अतिरिक्त आयुक्त सुजाता ढोले यांच्या समवेत ग्रहण केली. यावेळी पर्यावरण विषयक जनजागृती रॅली काढण्यात आली व स्वच्छता मोहीम राबविण्यात आली.
बेलापूर, नेरुळ, वाशी, तुर्भे, कोपरखैरणे, घणसोली, ऐरोली, दिघा अशा आठही विभाग कार्यालय क्षेत्रात नागरिकांचा मोठ्या संख्येने लोकसहभाग असलेल्या उपक्रमांचे आयोजन करण्यात आले होते. प्रदूषण विरहित वाहन म्हणून वापरल्या जाणाऱ्या युलू ई बाईकची विशेष जनजागृतीपर रॅली ज्वेल ऑफ नवी मुंबई पासून नेरुळ, बेलापूर परिसरात काढण्यात आली. यामध्ये आम्ही पर्यावरणपूरक वाहनांचा वापर करून प्रदूषणाला प्रतिबंध घालू असे अभिवचन देत 75 ई बाईकर्सनी अतिरिक्त आयुक्त सुजाता ढोले व घनकचरा व्यवस्थापन विभागाचे उपआयुक्त डॉ. बाबासाहेब राजळे यांच्यासह जनजागृतीपर ई बाईक रॅलीमध्ये उत्साहाने सहभाग घेतला. याप्रसंगी ज्वेल ऑफ नवी मुंबई येथे मान्यवरांच्या शुभहस्ते वृक्षारोपणही करण्यात आले. विद्यार्थी, युवक, महिला, ज्येष्ठ यांच्यासह नागरिकांनी उत्साहात सहभागी होत आपापल्या परिसरात जनजागृतीपर रॅली काढून स्वच्छता, वृक्षारोपण, प्रदूषण प्रतिबंध, प्लास्टिकचा वापर टाळणे अशा विविध विषयांवर घोषणा देत तसेच संदेश लिहिलेले बॅनर्स, हस्तफलक उंचावत लोकजागृती केली. प्रत्येक विभागामध्ये शेकडो नागरिक या रॅलीमध्ये सहभागी झाले होते.
रॅली झाल्यानंतर परिसरात स्वच्छता मोहिमाही राबविण्यात आल्या. त्याचप्रमाणे आरआरआर सेंटरची माहिती प्रसारित करीत त्याठिकाणी माझी वसुंधरेची व केंद्र सरकारच्या लाईफ उपक्रमाची सामुहिक शपथ ग्रहण करण्यात आली. संबंधित विभागांच्या सहाय्यक आयुक्त तथा विभाग अधिकारी यांच्या नियंत्रणाखाली आयोजित करण्यात आलेल्या या विशेष उपक्रमांमध्ये पर्यावरप्रेमी नवी मुंबईकर आबालवृध्द नागरिक मोठ्या प्रमाणात सहभागी झाले होते.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai