दिवाळी महागृहनिर्माण योजनेस मुदतवाढ

दिवाळी महागृहनिर्माण योजनेस मुदतवाढ

by Aajchi Navi Mumbai
Dec 24, 2022
224

नवी मुंबई ः सिडको महामंडळाच्या महागृहनिर्माण योजना दिवाळी-2022 या गृहनिर्माण योजनेस मिळत असलेल्या नागरिकांच्या प्रतिसादामुळे आणि नागरिकांना केलेल्या मागणीमुळे सदर योजनेकरिता ऑनलाइन अर्ज नोंदणी करण्यास 06 जानेवारी 2023 पर्यंत मुदतवाढ देण्याचा निर्णय सिडकोने घेतला आहे. या योजनेकरिता अर्ज नोंदणी करण्यास 22 डिसेंबर 2022 ही अंतिम तारीख होती. परंतु अधिकाधिक नागरिकांचे घराचे स्वप्न पूर्ण व्हावे यासाठी योजनेस मुदतवाढ दिली आहे.

सिडकोतर्फे या वर्षीच्या दिवाळीच्या शुभू मुहूर्तावर 24 ऑक्टोबर 2022 रोजी महागृहनिर्माण योजना दिवाळी-2022 अंतर्गत नवी मुंबईच्या उलवे नोडमधील बामणडोंगरी रेल्वे स्थानक, खारकोपर पूर्व 2ए, खारकोपर पूर्व 2बी आणि खारकोपर पूर्व 2पी येथे 7,849 सदनिका या प्रधानमंत्री आवास योजनेंतर्गत आर्थिकदृष्ट्या दुर्बल घटकातील नागरिकांसाठी उपलब्ध करून देण्यात आल्या होत्या. या योजनेद्वारे झपाट्याने विकसित होत असलेल्या व परिवहनदृष्ट्या समृद्ध असलेल्या उलवे नोडमध्ये परवडणार्‍या दरातील घर घेण्याची संधी नागरिकांना उपलब्ध झाली आहे.

सुधारित वेळापत्रकाप्रमाणे महागृहनिर्माण योजना दिवाळी-2022 करीता ऑनलाइन अर्ज नोंदणी 06 जानेवारी 2023 पर्यंत करता येणार आहे. ऑनलाइन अर्ज 07 जानेवारी 2023 पर्यंत सादर करता येणार आहेत. ऑनलाइन शुल्क भरणा 07 जानेवारी 2023 पर्यंत करता येणार आहे. स्वीकृत अर्जदारांची प्रारुप यादी 14 जानेवारी 2023 रोजी तर स्वीकृत अर्जदारांची अंतिम यादी 18 जानेवारी 2023 रोजी सिडकोच्या संकेतस्थळावर प्रसिद्ध करण्यात येईल. योजनेची संगणकीय सोडत 03 फेब्रुवारी 2023 रोजी पार पडणार आहे.