Breaking News
पनवेल : कर्जत व पनवेल तालुक्याच्या ग्रामीण भागात विकासासाठी महत्वपूर्ण असलेल्या कर्जत-पनवेल रेल्वे स्थानकदरम्यान शटल रेल्वे सुरू करण्यासाठी भाजपने पहिले पाऊल टाकले आहे.
कोकण पदवीधर मतदारसंघातील भाजपचे आमदार निरंजन डावखरे, आ. प्रशांत ठाकूर आणि आ. महेश बालदी यांच्या मागणीनंतर रेल्वेमंत्री अश्विनी वैष्णव यांनी शटल सेवेसाठी सर्वेक्षण करण्याचे निर्देश दिले आहेत. अडीच वर्षांपासून बंद असलेल्या नेरळ-माथेरान रेल्वे सेवा सुरू करण्याबाबत सुरक्षाविषयक पाहणीही तातडीने करण्याचे निर्देश दिले आहेत. कर्जत व पनवेल तालुक्यातील रेल्वे प्रश्नांसंदर्भात खासदार विनय सहस्रबुद्धे यांच्या नेतृत्वाखाली भाजपच्या शिष्टमंडळाने रेल्वेमंत्री अश्विनी वैष्णव यांची भेट घेतली. या शिष्टमंडळात आमदार निरंजन डावखरे, आमदार महेश बालदी, माथेरानचे उपनगराध्यक्ष आकाश चौधरी, शहराध्यक्ष प्रवीण सपकाळ, उपाध्यक्ष किरण चौधरी, नगरसेवक राकेश चौधरी, संदीप कदम, संजय भोसले, कर्जत भाजपाचे पदाधिकारी किरण ठाकरे आदींचा समावेश होता.
कर्जत-पनवेल रेल्वे मार्गावरून सध्या लांब पल्ल्याच्या गाड्या धावतात. मात्र, शटल वा लोकल सेवा नसल्यामुळे स्थानिक ग्रामस्थ व चाकरमान्यांना प्रवासात अडचणी येत होत्या. त्याचबरोबर या भागाच्या विकासालाही मर्यादा आल्या आहेत. या प्रश्नावर आमदार निरंजन डावखरे, आ. प्रशांत पाटील आणि आ. महेश बालदी यांनी रेल्वे मंत्रालयाकडे प्रयत्न सुरू केले आहेत.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai