Breaking News
उरण ः जेएनपीटी टाऊनशिप येथे युवकांच्या नोकऱ्या संदर्भात एका बैठकीचे आयोजन करण्यात आले होते. या बैठकीत स्वामी विवेकानंद जयंती निमित्त राष्ट्रीय युवा दिनाचे औचित्य साधून 12 जानेवारी 2023 रोजी मल्टीपर्पज हॉल, टाऊनशिप, उरण येथे दुपारी 3 वाजता बेरोजगार युवकांचा मेळावा घेण्याचा निर्धार करण्यात आला. या मेळाव्यासाठी प्रकल्पबाधित (सेझ) बेलपाडा, करळ, सावरखार, सोनारी, जसखार या गावाच्या सेझ कमीट्या व सर्व सरपंच आणि इच्छुक सर्वपक्षीय नेते मंडळीना बेरोजगार युवकांना मार्गदर्शन करण्यासाठी आमंत्रित करण्यात आले आहे.
2025 पर्यंत उरण सेझमध्ये दहा हजार पेक्षा अधिक नोकर भरती होणार आहे. मात्र ही भरती पैसे भरून किंवा दलाली करून व्हायला नको. कोणत्याही बेरोजगार युवकाला एकही रुपये न भरता आपल्या कर्तृत्वावर, गुणवत्तेवर युवकांनी नोकरी मिळवली पाहिजे. रोजगार नसल्याने त्या बेरोजगार युवकाला व त्यांच्या कुटुंबियांना विविध समस्याला सामोरे जावे लागते असे चित्र उरण तालुक्यात सर्वत्र आहे. तसेच नोकऱ्या लावणाऱ्या दलालांचे मोठ्या प्रमाणात सुळसुळाट झाला आहे. असे दलाल भ्रष्टाचाराला खतपाणी घालत आहेत. उरण तालुक्यातील सेझ बांधितांना अगोदर नोकरी मिळाली पाहिजे नंतर प्रकल्पग्रस्त सिडको बाधितांना नोकरी मिळाली पाहिजे अशी भूमिका ज्येष्ठ साहित्यिक तथा कोकण मराठी साहित्य परिषदेचे संपर्क प्रमुख रायगड भूषण एल.बी. पाटील यांची आहे. बेलपाडा, करळ , सावरखार, सोनारी, जसखार आदि गावात प्रचंड प्रमाणात बेरोजगारी आहे या गावातील नागरिकांच्या जमिनी सेझ प्रकल्पासाठी संपादित झाल्या आहेत. मात्र त्यांना अजूनही नोकऱ्या मिळालेल्या नाहित. तर सिडको, जेएनपीटीने संपादित जमिनीवर आज अनेक प्रकल्प आहेत. प्रकल्प चालू होऊनही येथील बेरोजगारांना न्याय मिळत नाही. नोकर भरतीत स्थानिकांना प्राधान्य दिले जात नाही. गावोगावी विविध समिती स्थापन करुन या समितीच्या माध्यमातून भरती व्हावी या अनुषंगाने जनजागृती करण्याच्या उद्देशाने 12 जानेवारी 2023 रोजी अर्थात राष्ट्रीय युवा दिनी बेरोजगार युवकांचा मेळावा भरविला जाणार आहे.
उरण तालुक्यातील स्थानिक भूमीपुत्रांना नोकरीत प्राधान्य मिळाले पाहिजे. पैसे घेउन नोकरी लावणाऱ्यांची दलाली बंद झाली पाहिजे. उरण मधील स्थानिक तरुणांना एक रुपयाही न भरता नोकरी मिळाली पाहिजे यासाठी युवकांमध्ये जनजागृती करण्याच्या उद्देशाने 12 जानेवारी 2023 रोजी जेएनपीटी टाऊनशिप येथे बेरोजगार युवकांचा मेळावा आयोजित केला आहे. -एल बी पाटील जेष्ठ साहित्यिक, उरण
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai