Breaking News
नवी मुंबई ः वाशी येथील बस टर्मिनसच्या भूखंडावर बांधण्यात येत असलेेले वाणिज्य संकुल वादात सापडले आहे. वाशीतील स्थानिक रहिवाशी रोहित मल्होत्रा यांनी 2019 साली पंतप्रधान पोर्टलवर केलेल्या तक्रारीवर नवी मुंबई महापालिकेला कारवाई करण्यास सांगितले होते. या तक्रारीची दखल महापालिकेने घेतली नसल्याने आश्चर्य व्यक्त केले जात आहे.
नवी मुंबई महापालिकेने 151 कोटी रुपये खर्च करुन वाशी बस डेपोच्या भूखंडावर वाणिज्य संकुल उभारण्याचे काम हाती घेतले आहे. सदर प्रकल्पास पर्यावरण विभागाचा ना हरकत दाखला तसेच केंद्र सरकारच्या फ्लेमिंगो अधिवास संरक्षणासाठी वन विभागाची परवानगी घेतली नसल्याची तक्रार सामाजिक कार्यकर्ते रोहित मल्होत्रा यांनी पंतप्रधान कार्यालयाच्या पोर्टलवर केली होती. या तक्रारीत सदर वाणिज्य संकुलामुळे सभोवतालच्या इमारती सुर्यप्रकाश आणि स्वच्छ हवा यापासून वंचित राहणार असल्याचे नमुद केले होते. सदर इमारत ही 21 मजली असून त्यावर काचेचे आच्छादन लावण्यात येणार असल्याने सभोवतालचे तापमान वाढण्याची शंका त्यांनी व्यक्त केली आहे. शिवाय या प्रकल्पासाठी वाहतुक अहवालही बनवला नसल्याचे सांगितले आहे. याप्रकल्पासाठी सोशल इम्पॅक्ट आणि पर्यावरण इम्पॅक्ट अहवाल बनवला नसल्याची तक्रार केली होती. हा प्रकल्प सामाजिक सेवा व सुविधा भूखंडावर राबवताना स्थानिक रहिवाशांच्या सूचना व हरकती मागवल्या नसल्याचा आरोप त्यांनी तक्रारीत केला होता. सदर तक्रारीची दखल पंतप्रधान कार्यालयाने घेऊन ती नगरविकास विभागामार्फत नवी मुंबई महापालिकेकडे पुढील कार्यवाहीसाठी वर्ग करण्यात आली होती.
पंतप्रधान कार्यालयाने सदर तक्रार नवी मुंबई महापालिकेकडे पाठवून तीन वर्ष उलटून गेल्यावरही कोणतीही कारवाई करुन अहवाल पाठवलेला नाही. याबाबत तक्रारदार रोहित मल्होत्रा यांच्याशी संपर्क केला असता सदर प्रकल्प हा नवी मुंबईकरांच्या सामाजिक स्वास्थाच्या दृष्टीने अपायकारक असल्याचे सांगितले.
माझ्या तक्रारीनंतर केंद्र सरकारने सदर प्रकल्पाला स्थगिती दिल्याचे मला सांगण्यात आले होते. सरकारने सूमारे 3 कोटी रुपयांचा दंड आकारुन सदर प्रकल्पास फ्लेमिंगो सरंक्षण अधिवासाची मंजूरी दिल्याचे सांगण्यात येत आहे. सदर दंडाची रक्कम पालिकेच्या तिजोरीतून न जाता ती संबंधित अधिकार्यांच्या पगारातून भरणे गरजेचे आहे. - रोहित मल्होत्रा, सामाजिक कार्यकर्ते
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai