Breaking News
पाणीकपात रद्द; 74% पाणीसाठ्यापैकी 58.43% उपयुक्त पाणी
नवी मुंबई ः मोरबे धरणात झालेल्या जोरदार पर्जनवृष्टीमुळे धरणातील पाणीसाठ्यात वाढ झाली आहे. एका दिवसात पाणीसाठ्यात आठ टक्के वाढ झाली असून, उरलेल्या दोन महिन्यात पडणाऱ्या पावसामुळे धरण पुर्ण भरण्याची अपेक्षा आहे. तसेच सध्या 29 मार्च 2025 पर्यंत पुरेल एवढा पाणीसाठा असल्याने पालिकेने संध्याकाळच्या पाणी पुरवठयात केलेली पाणीकपात रद्द करण्याचा निर्णय घेतला आहे. त्यामुळे नवी मुंबईकारांना मोठा दिलासा मिळाला आहे.
महानगरपालिकेच्या मोरबे धरणामधून नवी मुंबई महानगरपालिका क्षेत्रास पाणीपुरवठा होत असून यावर्षी पावसाळी कालावधी सुरू होऊनही 15 जून 2024 पर्यंत केवळ 78.60 मिमी इतकाच अपुरा पाऊस झालेला होता. त्यावेळी मोरबे धरणामध्ये फक्त 26% इतकाच पाणी साठा शिल्लक होता. त्यामुळे नवी मुंबई महानगरपालिका क्षेत्रामध्ये पाणी पुरवठा करताना संध्याकाळच्या पाणी पुरवठयात वाढीव कपात करण्यात आलेली होती. या वर्षी पाऊस उशिरा सुरू झाल्यामुळे मोरबे धरणातील पाणीसाठा कमी होत चालला होता. 1 जुलैपर्यंत 561 मि. मी. पावसाची नोंद झाली होती. धरणात 54 दिवस पुरेल एवढाच पाणीसाठा शिल्लक होता; परंतु मागील काही दिवसांमध्ये समाधानकारक पाऊस पडू लागला आहे. गुरुवारी धरण परिसरात मुसळधार पाऊस सुरू झाला. आतापर्यंत एकूण पाऊस 2407.20 मि.मी. एवढा झाला होता. धरणाची पातळी 82.60 मीटरपर्यंत वाढली आहे. मोरबे धरणामध्ये एकूण 74% पाणी साठा उपलब्ध असला तरी 58.43% उपयुक्त पाणीसाठा आहे. तो पुढील 248 दिवस म्हणजे 29 मार्च 2025 पर्यंत पुरेल एवढा आहे. धरण पूर्ण भरण्यासाठी अजून 1 हजार मि. मी. पाऊस पडण्याची आवश्यकता आहे. यामुळे ऑगस्टमध्ये धरण भरेल अशी अपेक्षा आहे. सध्या मुबलक पाणी असल्याने पालिकेने केलेली पाणीकपात रद्द केली आहे. 29 जुलै 2024 पासून पाणी पुरवठा नियमितपणे सुरू राहील असे पालिकेने प्रसिद्धपत्रकाद्वारे कळविले आहे.
मोरबे धरण पाणीसाठ्याचा तपशील
25 जुलै दिवसभरातील
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai