सायक्लोथॉनला उत्साही प्रतिसाद

सायक्लोथॉनला उत्साही प्रतिसाद

by Aajchi Navi Mumbai
Mar 15, 2023
154

अडीचशेहून अधिक सायकलपटूंचा सहभाग

नवी मुंबई ः माझी वसुंधरा अभियानांतर्गत आयोजित सायक्लोथॉनला अडीडशेहून अधिक पर्यावरणप्रेमी नागरिकांनी जो उत्साही प्रतिसाद दिला. वय वर्षे 4 ते वयाची साठी पार करणाऱ्या ज्येष्ठ नागरिकांपर्यंत विविध वयोगटातील नागरिकांनी सायक्लोथॉनमध्ये उत्साही सहभाग घेत हा पर्यावरणशील उपक्रम यशस्वी केला.

माझी वसुंधरा अभियान 3.0 अंतर्गत नवी मुंबई महानगरपालिका क्रीडा व सांस्कृतिक विभाग आणि सायकलिस्ट क्लब ऑफ इंडिया यांच्या संयुक्त विद्यमाने आयोजित सायक्लोथॉन 2023 ला हिरवा झेंडा दाखवित आयुक्त राजेश नार्वेकर यांनी सायक्लोथॉनचा शुभारंभ केला. माझी वसुंधरा अभियानात नवी मुंबई हे राज्यात प्रथम क्रमांकाचे शहर असून यावर्षीही प्रथम क्रमांक कायम राखण्याचा निर्धार करीत व्यापक लोकसहभाग घेत पर्यावरणपूरक विविध उपक्रमांचे आयोजन करण्यात येत आहे. त्याचाच एक भाग म्हणूच सायक्लोथॉनसारख्या अभिनव उपक्रमाचे आयोजन करण्यात आले होते. मोराज सर्कल ते नमुंमपा मुख्यालयापर्यंतच्या साधारणत: 8 किमी अंतराच्या सायक्लोथॉनमध्ये सहभागी होत हे अंतर पार करणाऱ्या सायकलपटूंना मुख्यालयाठिकाणी प्रशस्तिपत्रे प्रदान करून सन्मानीत करण्यात आले. यामध्ये हर्ष विजय जाधव हा अवघा 4 वर्षांचा मुलगा विशेष आकर्षण ठरला. सायकलसारख्या प्रदूषणविरहित पर्यावरणपूरक वाहनाचा अवलंब करणाऱ्या व इतरांनीही तसे करावे म्हणून सायक्लोथॉनच्या माध्यमातून पर्यावरण रक्षणाचा व वसुंधरेच्या संवर्धनाचा संदेश देणाऱ्या सहभागी सायकलपटूंची अतिरिक्त आयुक्त सुजाता ढोले यांनी प्रशस्तिपत्रे वितरित करताना प्रशंसा केली. युलू जन सायकल सहभाग प्रणालीला नवी मुंबईकर नागरिकांकडून जो प्रचंड प्रमाणात प्रतिसाद मिळतो आहे, त्यामुळे नवी मुंबई हे देशातील अग्रणी सायकलप्रेमी शहर म्हणून नावाजले जात असल्याचा विशेष उल्लेख याठिकाणी करण्यात आला.