Breaking News
नवी मुंबई : दसऱ्याच्या मुहुर्तावर सिडकोने 26 हजार घरांची योजना जाहीर करण्याची लगीनघाई केली असून मुख्यमंत्र्यांच्या हस्ते या योजनेचा शुभारंभ करण्यात आला. 12 ऑक्टोबरपासून ‘माझे पसंतीचे सिडकोचे घर' या योजनेंतर्गत ऑनलाइन अर्ज नोंदणीला सुरुवात झाली. या योजनेमध्ये ग्राहकांना आपल्या पसंतीचा प्रकल्प, टॉवर्स व मजला निवडता येणार आहे. मात्र घरांच्या किमंती सिडकोने गुलदस्त्यात ठेवल्या आहेत. त्यामुळे अर्ज करणाऱ्यांमध्ये संभ्रम पसरला आहे.
सिडको प्रदर्शन केंद्रात 11 ऑक्टोबर 2024 रोजी मुख्यमंत्री, एकनाथ शिंदे यांच्या हस्ते आर्थिकदृष्ट्या दुर्बल घटक व अल्प उत्पन्न गटासाठीच्या या योजनेचे उदघाटन करण्यात आले. या योजनेच्या पहिल्या टप्प्यांतील 26000 घरे ग्राहकांना उपलब्ध करण्यात आली आहेत. या योजनेतील प्रकल्पांचा विकास सिडकोच्या परिवहनकेंद्रित विकास तथा ट्रान्झिट ओरिएन्टेड डेव्हलपमेंट या संकल्पनेवर केंद्रित असून, या योजनेत साकारली जाणारी सर्व घरे ही संबंधित नोड्समधील रेल्वे स्थानके, बस स्थानके व मेंट्रो स्थानकांच्या जवळच बांधण्यात आली आहेत. या शिवाय अतिशय अत्याधुनिक बांधकाम तंत्राचा वापर करून विकसित केलेल्या या योजनतील गृहसंकुले सर्व प्रकारच्या पायाभूत व सामाजिक सोयी-सुविधांनी युक्त आहेत.
12 ऑक्टोबरपासून या योजनेंतर्गत ऑनलाइन अर्ज नोंदणीला सुरुवात झाली असून 11 नोव्हेंबरपर्यंत सुरु राहणार आहे. त्यानंतर बुकिंग पद्धत 15 दिवसांसाठी होणार आहे. ‘माझे पसंतीचे सिडकोचे घर' या योजनेच्या पहिल्या 24 तासांतच तब्बल 12,400 ऑनलाईन अर्ज प्राप्त झाले आहेत. सदर योजनेचे संकेतस्थळ https:\\.cidcohomes.com असून नागरिक या योजनेस उत्तम प्रतिसाद देत आहेत. यात पंतप्रधान आवास योजनेअंतर्गत आर्थिकदृष्ट्या दुर्बल घटकांसाठी 13 हजार, तर अल्प उत्पन्न गटासाठी 13 हजार घरांचा समावेश आहे. या योजनेमध्ये पसंती नुसार अर्जदाराला प्रकल्प, टॉवर्स तसेच मजल्यांची संख्या निवडता येणार आहे. यामध्ये 15 पसंती निवडू शकतात. यासाठी सोडतीच्या 3 फेऱ्या होणार असून प्रत्येक फेरीमध्ये कमाल 5 आणि किमान 1 निवडी देऊ शकतात. पसंती दिल्यानंतर अर्जदारांना आर्थिकदृष्ट्या दुर्बल घटकांसाठी 75000 रुपये अधिक जीएसटी तर अल्प उत्पन्न गटासाठी 1,50,000 लाख अधिक जीएसटी तर 2 बीएचे गटासाठी 2 लाख अधिक जीएसटी अशी बुकिंग रक्कम भरावी लागणार आहे. सिडकोने योजनेचे स्वरुप जाहीर करुन अर्ज नोंदणीला सुरुवात केली आहे. मात्र अजून या घरांच्या किमंती जाहीर केलेल्या नाहीत. त्यामुळे अर्ज करण्यास ईच्छुक असणाऱ्या सर्वसामान्य जनतेने हात आखडता घेतला आहे. घरांचे बजेट माहित नसल्याने नोंदणी कशी करायची असा प्रश्न त्यांना पडला आहे. तसेच यापुर्वीच्या सिडकोच्या सर्व गृहनिर्माण योजना ज्या संकेतस्थळावर जाहीर केल्या जात असत त्या संकेतस्थळावर ही नवीन योजना जाहीर केली नसून वेगळे संकेतस्थळ निर्माण केले आहे. यामुळेही जनतेत संभ्रम पसरला आहे. त्यामुळे सिडकोने केवळ निवडणुकीसाठी आचारसंहितेपुर्वी अर्धवट माहिती असलेली योजना जाहीर करण्याची लगीनघाई केल्याची चर्चा नवी मुंबईत सुरु आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai