Breaking News
पालकांकडून निदर्शने करत निषेध व्यक्त
उरण : उरण एज्युकेशन सोसायटी या नामांकित इंग्रजी माध्यमाच्या विद्यालय प्रशासनाने चालविलेल्या मनमानी विरोधात पालकांनी जाब विचारत जोरदार निदर्शने करत निषेध केला. सोमवारी शाळेच्या व्यवस्थापना विरोधात एक होत पंचायत समितीच्या गट शिक्षण विभागाला निवेदन देण्यात आले आहे. स्वातंत्र्य दिनाच्या पुर्वसंध्येला पालकांनी व्यवस्थापनाला त्यांच्याकडून पालकांना विश्वासात न घेता घेण्यात आलेल्या आर्थिक निर्णयाचा जाब विचारत हा निषेध नोंदविला.
उरण तालुक्यातील नामांकित उरण एज्युकेशन सोसायटीची युईएस इंग्रजी माध्यमाची 12 पर्यंत शाळा आहे.या शाळेच्या मनमानी कारभाराविरोधात मागील अनेक वर्षांपासून पालक-शिक्षक संघटनेचा संघर्ष सुरू आहे. नुकतेच पालक-शिक्षक संघटनेला अंधारात ठेवून विद्यार्थ्यांच्या ओळखपत्राच्या नावाखाली 550 रुपये वसूल करण्यात येत आहेत. दोन दिवसांपूर्वी शाळेच्या सभागृहात झालेल्या बैठकीत या वादग्रस्त निर्णयावर संघटना आणि व्यवस्थापन यांच्यात जोरदार वादळी चर्चा झाली. चर्चेत ओळखपत्रासाठी करण्यात येत असलेल्या भरमसाठ फी आकारणी विरोधात संतप्त झालेल्या संघटना आणि पालकांनी व्यवस्थापनाला धारेवर धरले. त्यामुळे व्यवस्थापनाने बैठकीतुनच काढता पाय घेतला.व्यवस्थापनाचा पळपुटेपणा पालक संघटनेला भावला नसल्याने सोमवारी (14) शाळेच्या आवारातच उत्स्फूर्तपणे जमलेल्या पालक-शिक्षक संघटनेच्या कार्यकर्ते, पदाधिकारी आणि पालकांनी व्यवस्थापना विरोधात जोरदार निदर्शने करून निषेध व्यक्त केला. इतक्यावरच न थांबता पालक-शिक्षक संघटनेचे पदाधिकारी, कार्यकर्त्यांनी युईएस व्यवस्थापनाच्या मनमानी कारभाराचा पाढा वाचून उरण गटशिक्षणाधिकाऱ्यांकडे लेखी तक्रार केली. गटशिक्षण अधिकारी प्रियांका पाटील यांनी तक्रारीची दखल घेत चौकशी करण्याचे आश्वासन दिले आहे. दरम्यान सातत्याने करण्यात येणाऱ्या भरमसाठ फी वाढीमुळे पालकांना ती भरणे अवघड जात आहे. तर वाढविण्यात आलेली फी सक्तीने वसूल केली जात आहे. शाळा व्यवस्थापनाच्या मनमानी कारभाराच्या विरोधात यापुढेही संघर्ष कायम सुरू राहणार असल्याची संतप्त प्रतिक्रिया पालक-शिक्षक संघटनेच्या उपाध्यक्षा ॲड.प्रतिभा भालेराव यांनी व्यक्त केली आहे.
मुले शाळेत येताना आणि शाळा सुटल्यावर बाहेर जाताना पालकांना माहिती देणारी तंत्रज्ञानाचा वापर करून अत्याधुनिक यंत्रणा कार्यान्वित करण्यात आली आहे. या अत्याधुनिक यंत्रणेपोटीच फी आकारणी केली जात आहे. 65 टक्के पालकांनी तर फी अदाही केली आहे.मात्र शाळेची नाहक बदनामी करण्याच्या कटकारस्थानामागे काही राजकीय संघटना कार्यरत आहेत.शाळा व्यवस्थापनाचे कामकाज नियमानुसार सुरू आहे.अशी प्रतिक्रिया युईएस संस्थेचे अध्यक्ष तनसुख जैन यांनी दिली.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai