Breaking News
नवी मुंबई : स्मार्ट व्हिलेज म्हणून ओळखल्या जाणाऱ्या दिवाळे गावात अनेक सोयीसुविधांचे जाळे विस्तारत आहे. नुकतेच डोलकर मच्छीमारांसाठी आमदार मंदा म्हात्रे यांच्या निधीतून जेटी व सोलार हायमास्टचे भूमिपूजन करण्यात आले आहे. त्यासाठी सुमारे दहा कोटी रुपये मंजूर झाले आहेत. त्यामुळे मच्छीमारांना सुविधा मिळणार आहेत. तसेच सोलारवर चालणारे हायमास्टही उभारण्यात येणार असल्याने रात्रीही काम करणे सोयीचे होणार आहे.
नव्याने होत असलेल्या नवी मुंबई आंतरराष्ट्रीय विमानतळासमोरच ही जेटी उभारण्यात येणार आहे. त्यामुळे येथील स्थानिक मच्छीमारांना व्यवसायासाठी मोठ्या प्रमाणात फायदा होणार आहे. तसेच सोलर हायमास्टकरिता 25 कोटी एवढा मोठा निधी उपलब्ध केला आहे. आमदार मंदा म्हात्रे यांच्या प्रयत्नांतून दिवाळे गावातील शेकडो कोटींची विकासकामे करण्यात आली आहेत. दिवाळे गावाच्या विकासासाठी अनेक कोटींची तरतूद केलेली आहे. स्मार्ट व्हिलेजअंतर्गत भव्य सुसज्ज सर्व सुविधांयुक्त मच्छी मार्केट, सुसज्ज शाळा, उद्यान, मासे सुकविण्यासाठी प्लॅटफॉर्म, स्टेज, समाज मंदिर, रिंगरोड, स्वाध्याय हॉल, प्रसाधनगृहे, लहान मुलांकरिता खेळणी, विरंगुळा केंद्र, गजेबो गार्डन, बहुउद्देशीय इमारत, ओपन जिम, चारचाकी वाहनतळ, भाजी व फळ मार्केट, तसेच सुशोभीकरण करण्यात येणार आहे. याकरिता आमदार निधीची तरतूदही करण्यात येणार आहे. भूमिपूजन कार्यक्रमाला उत्तर भारतीय मोर्चाचे राजेश राय, दर्शन भारद्वाज, जयश्री चित्रे, वेंकट चिखले, नीलेश पाटील, नीलेश डोंगरे, ज्ञानेश्वर कोळी, नीलकंठ कोळी, संतोष कोळी, डोलकर मच्छीमार सदस्य तुकाराम कोळी, खांदेवाले मच्छीमार अध्यक्ष रमेश हिंडे, ज्येष्ठ नागरिक संस्था अध्यक्ष चंद्रकांत कोळी, तसेच असंख्य भाजप पदधिकारी व स्थानिक कोळी बांधव उपस्थित होते.
दिवाळे गाव हे स्मार्ट व्हिलेज म्हणून तयार होणार असल्याने स्थानिकांना रोजगार मिळणार आहे, चांगले शिक्षण, आरोग्य सुदृढ होण्यास मदत मिळणार आहे. स्वच्छता व सार्वजनिक उपक्रमाला चालना मिळणार आहे. पंतप्रधान नरेंद्र मोदी यांनी पाहिलेले स्वप्न नवी मुंबईतील दिवाळे गाव स्मार्ट व्हिलेज करून साकार करून दाखवणार असल्याचा विश्वास म्हात्रे यांनी व्यक्त केला.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai