Breaking News
सर्वोच्च न्यायालयाचा निर्णय लवकरच अपेक्षित
मुंबई ः सर्वोच्च न्यायालयाच्या निर्णयानंतर महाराष्ट्रात राजकीय भूकंप घडण्याची शक्यता वर्तविली जात आहे. हा निर्णय पुढील आठवड्यात येण्याची शक्यता असून त्यादृष्टीने राज्यातील विविध राजकीय पक्षांनी मोर्चेबांधणीस सुरुवात केल्याचे कळत आहे. न्यायालय कोणता निर्णय देते यावर शिवसेना ठाकरे व शिंदे या दोन्ही गटांसह शिंदे-फडणवीस सरकारचे भवितव्य अवलंबून आहे. त्यामुळे न्यायालयाच्या निर्णयानंतर हेोणाऱ्या राजकीय पडझडीला कसे सामोरे जावे याच्या रणनितीसाठी सत्ताधारी आणि विरोधी पक्षांकडून बैठकांचा सपाटा सुरु आहे.
शिवसेनेतील बंडखोरी आणि शिंदे-फडणवीस सरकारची स्थापना याबाबत सुनावणी पुर्ण होऊन तीन आठवड्याहून अधिक कालावधी लोटला आहे. सर्वोच्च न्यायालयाने राखून ठेवलेला निर्णय येत्या आठवड्यात जाहीर होण्याची शक्यता असल्याने सर्वच राजकीय पक्षात हालचालींना वेग आला आहे. सर्वोच्च न्यायालय कोणाच्या पारड्यात आपला निकाल टाकते त्यावर शिवसेना ठाकरे व शिंदे गटाचे राजकीय भवितव्य अवलंबून आहे. यापुर्वी केंद्रिय निवडणुक आयोगाने शिवसेना नाव व धनुष्यबाण चिन्ह शिंदे गटाला बहाल केल्याने उद्धव ठाकरे यांच्याकडे आता गमावण्यासारखे काही नसल्याचे राजकीय तज्ज्ञांचे मत आहे. त्यातच उद्धव ठाकरे व आदित्य ठाकरे हे या बंडखोरीमुळे पक्षाला बसलेल्या फटक्यातून सावरले असून त्यांनी कार्यकर्त्यांच्या बैठका व जाहीर सभांचा सपाटा लावला आहे. या सभांना जनतेचा मिळणारा प्रतिसाद पाहिल्यानंतर शिवसेनेला आजही जनसमर्थन असल्याचे बोलले जात आहे.
जर सर्वोच्च न्यायालयाचा निर्णय शिंदे गटाच्या विरुद्ध गेल्यास एकनाथ शिंदेंसह त्यांच्या 40 समर्थक आमदारांचे राजकीय भवितव्य अंधारात जाणार असल्याने त्याचा मोठा फटका शिंदे-फडणवीस सरकारला बसण्याची शक्यता आहे. या निकालाने जर शिंदेंसह त्यांच्या समर्थक आमदारांवर अपात्रतेच्या कारवाईवर शिक्कामोर्तब झाल्यास पुन्हा शिवसेना नाव व चिन्ह उद्धव ठाकरे यांच्याकडे येण्याची शक्यता घटनातज्ञ व्यक्त करत आहेत. त्याचबरोबर अध्यक्ष निवडणुकीत पक्षाचा व्हिप डावलून पक्षविरोधी मतदान करणाऱ्या 40 आमदारांवर अपात्रतेची कारवाई झाल्यास निवडणुका वर्षभरात असल्याने पोटनिवडणुका होण्याची शक्यता कमी असल्याचे बोलले जात आहे. त्यामुळे महाराष्ट्रात राष्ट्रपती राजवटीची शक्यता वर्तवली जात आहे. या सर्व पार्श्वभुमीवर सर्वात मोठा फटका भारतीय जनता पक्षाला बसणार असून त्याचे सर्व खापर देवेंद्र फडणवीस यांच्यावर फुटण्याची शक्यता आहे. फडणवीस यांचे पक्षातील विरोधक त्याक्षणाची आतूरतेने वाट पाहत असून सर्वांचे लक्ष न्यायालयाच्या निर्णयाकडे लागले आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai