Breaking News
नरेश म्हस्के, वेंगुर्लेकर व विजू माने रडारवर
मुंबई ः महाराष्ट्र भुषण पुरस्कार सोहळा आयोजित करण्याचे काम माहिती व जनसंपर्क विभागाने कन्सेप्ट कम्युनिकेशन कंपनीला दिले होते. त्यांनी ते काम वेंगुर्लेकर, नरेश म्हस्के व विजु माने भागिदार असलेल्या लाईट अँड शेड कंपनीला दिल्याचा आरोप सेनेच्या फायर ब्रँड नेत्या सुषमा अंधारे यांनी केला आहे. तसेच या दुर्घटनेत बळी गेलेल्यांच्या मृत्यूला हीच कंपनी जबाबदार असल्याने मुख्यमंत्र्यांसह या कंपनीवर सदोष मनुष्यवधाचा गुन्हा दाखल करण्याची मागणी अंधारे यांनी केल्याने आयोजकांचे पितळ उघडे पडले आहे.
महाराष्ट्र सरकारने या वर्षाचा महाराष्ट्र भूषण पुरस्कार दासबोध निरूपणकार आप्पासाहेब धर्माधिकारी यांना दिला आहे. हा पुरस्कार मिळाला म्हणून त्यांचा सत्कार वाशीमध्ये आयोजित करण्यात आला होता. परंतु धर्माधिकाऱ्यांचे अनुयायी महाराष्ट्रात लाखोंच्या संख्येने असल्याने त्यांची मने जिंकण्यासाठी शिंदे-फडणवीस सरकारने खारघर येथील सेंट्रल पार्कमध्ये मोठा सत्कार समारंभ आयोजित करण्याचा निर्णय घेतला. या सत्कार सोहळयासाठी पनवेल, ठाणे, नवी मुंबई महापालिकांसह सिडकोसारख्या शासकीय यंत्रणांना सरकारने कामाला लावले. या सत्कार सोहळयाला वीस लाख लोक जमविण्याचे उद्दीष्ट ठेवण्यात आले.
या कामाचे नियोजन करण्याची जबाबदारी महाराष्ट्र सरकारच्या माहिती व जनसंपर्क विभागामार्फत कन्सेप्ट कम्यूनिकेशन या कंपनीला देण्यात आली होती. ऐन उन्हाळयात हा समारंभ आयोजित केल्याने व अनुयायींनी आयोजकांनी अन्न पाण्याविना सहा तास ताटकळत ठेवल्याने तीव्र उष्णतेच्या लाटेचा फटका बसून आतापर्यंत 14 दासभक्तांनी आपले जीव गमावले आहेत. या घटनेनंतर आयोजनातील ढिसाळ नियोजन उघडकीस आले असून मतांसाठी लोकांच्या भावनांशी खेळल्याचा आरोप एकनाथ शिंदे व फडणवीस यांच्यावर विरोधकांनी केला आहे. या नियोजनातील अनेक त्रृटी दिवसेंदिवस उघडकीस येत असून शिवसेनेच्या फायरब्रँड प्रवक्त्या सुषमा अंधारे यांनी या मागिल नविन सत्य उघडकीस आणले आहे. हे काम महाराष्ट्र शासनाने कन्सेप्ट कम्यूनिकेशन यांना जरी दिले असले तरी ते काम शिंदे यांच्या निकटवर्तींच्या मालकीच्या लाईट ॲण्ड शेड इव्हेंट कंपनीला दिल्याचा घाणाघाती आरोप त्यांनी केला आहे. या कंपनीचे भागीदार शिंदे यांचे निकटवर्तीय नरेश म्हस्के, विजू माने व संदिप वेंगुर्लेकर असल्याचे सांगत त्यांनी शिंदेंसह कंपनीच्या संचालकांवर सदोष मनुष्यवधाचा गुन्हा दाखल करण्याची मागणी केली आहे. यामुळे गृहमंत्रीपद सांभाळणारे उपमुख्यमंत्री देवेंद्र फडणवीस कोणती भूमिका घेतात याकडे आता सर्वांचे लक्ष लागले आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai