Breaking News
मार्क्सवादी कम्युनिस्ट पक्ष आणि संघटना आयोजक
उरण : भारत देशाची राष्ट्रीय एकता व अखंडता टिकून राहावी,भारतीय संविधानाचे रक्षण व्हावे या दृष्टी कोणातून महात्मा गांधी जयंतीचे औचित्य साधून भारताचा कम्यूनिस्ट पक्ष (मार्क्सवादी ) व पुरोगामी धर्मनिरपेक्ष जन संघटनेच्या वतीने 02 ऑक्टोबर 2023 रोजी उरण शहरातील बाजारपेठेमधील गांधी चौकात उपोषण करण्यात आले.
देशात महागाई, भ्रष्टाचार हा अगदी शिगेला पोहोचला आहे. सर्व सार्वजनिक व सरकारी आस्थापनाचे खाजगीकरणाच्या नावाखाली देशाची संपत्ती कवडीमोल किंमतीने आपल्या दोस्त भांडवलदारांना विकली जात आहे. शिक्षण व आरोग्याचे खाजगीकरण केले जात आहे. त्यामुळे ते प्रचंड महाग झाले आहे. सरकारी नोकऱ्या ठेकेदारांमार्फत दिल्या जात आहेत. बेरोजगारी प्रचंड वाढलेली आहे. या सर्व परिणामांमुळे जनता मेटाकुटीला आलेली आहे.त्यांनी या प्रश्नांवर आवाज उठवू नये यासाठी जनतेमध्ये धर्माच्या, जातीच्या, भाषेच्या नावावर भेद निर्माण करून देशाच्या एकात्मतेला सुरुंग लावला जात आहे. तेव्हां या देशाचे सार्वभौम व धर्मनिरपेक्ष लोकशाहीचे रक्षण करण्यासाठी आपण सर्व देशप्रेमींनी एक होवू या असे आवाहन यावेळी कामगार नेते कॉम्रेड भूषण पाटील यांनी आपल्या भाषणातून केले. उपोषणादरम्यान भारताची एकता व एकात्मता आणि भारताचा गौरव कर्तव्य आणि अधिकार यांची जाणीव करून देण्यासाठी प्रतिज्ञा म्हणण्यात आली. त्याचप्रमाणे भारताचे संविधान आणि त्याची उद्देशिकेचे ही जाहीर वाचन करण्यात आले. यातून नागरिकांनी एकमेकांशी सलोख्याने वागण्याचे आवाहन करण्यात आले. या उपोषणात मार्क्सवादी कम्युनिस्ट पक्ष,जनवादी महिला संघटना,डी आय एफ आय,सीआयटीयु तसेच उरण मधील इतर संघटनानी पाठिंबा दिला. यावेळी माकप चे रायगड जिल्हा सचिव रामचंद्र म्हात्रे, सिटु चे भूषण पाटील, जनवादी महिला संघटनेच्या हेमलता पाटील, कुंदा पाटील, किसान सभेचे संजय ठाकूर,डी वाय एफ आय चे राकेश म्हात्रे आदीजण उपस्थित होते.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai