नवी मुंबई सांस्कृतिक कला क्रीडा महोत्सवाची मेजवानी

नवी मुंबई सांस्कृतिक कला क्रीडा महोत्सवाची मेजवानी

by Aajchi Navi Mumbai
Jan 17, 2025
46

श्री गोवर्धनी सार्वजनिक सेवा संस्था व सिडकोतर्फे आयोजन

नवी मुंबई ः श्री गोवर्धनी सार्वजनिक सेवा संस्था व सिडको यांच्या संयुक्त विद्यमाने सीबीडी येथील सुनील गावस्कर मैदान येथे आयोजित करण्यात आलेल्या नवी मुंबई सांस्कृतिक कला क्रीडा महोत्सव - 2025 उत्साहात प्रारंभ झाले. सदर महोत्सवाचे उदघाटन सुप्रसिद्ध गायक पद्मश्री शंकर महादेवन व नवी मुंबई महापालिकेचे आयुक्त डॉ. कैलास शिंदे यांच्या शुभहस्ते दीपप्रज्वलन करून करण्यात आले. तसेच या महोत्सवाची सुरुवात संत निरंकारी संस्थेला 2 व्हील चेयर देवून करण्यात केली. यावेळी गायक पद्मश्री शंकर महादेवन व न.मुं.म.पा.आयुक्त डॉ. कैलास शिंदे यांनी नागरिकांना संबेोधित केले. तसेच आमदार मंदाताई म्हात्रे यांनी प्रास्ताविक भाषण केले.

सालाबादप्रमाणे यावषही श्री गोवर्धनी सार्वजनिक सेवा संस्था व सिडको यांच्या संयुक्त विद्यमाने नवी मुंबई सांस्कृतिक कला क्रीडा महोत्सव-2025 चे आयोजन करण्यात आलेले आहे. श्री गोवर्धनी सार्वजनिक सेवा संस्थेच्या वतीने गेली 28 वर्षे समाजपयोगी, शैक्षणिक, व सांस्कृतिक कार्यक्रम, नाटय, संगीत व विविध स्पर्धेचे आयोजन करण्यात येत आहे. महिला व विद्यार्थ्यांच्या सुप्त गुणांना वाव मिळावा तसेच त्यांना एक व्यासपीठ तयार व्हावे या उद्देशाने श्री गोवर्धनी सार्वजनिक सेवा संस्थेच्या माध्यमातून या कार्यक्रमाचे आयोजन दरवष करण्यात येते. नवी मुंबईतील हजारो महिला या निमित्ताने एकत्र येऊन आपली कला सादर करतात. त्यामुळे कलाकारांना एक व्यासपीठ निर्माण होते. विद्यार्थ्यांसाठी व महिलांसाठी विविध मनोरंजक स्पर्धा आयोजित करून त्यांचे मनोबल वाढवले जाते. आजपासून या महोत्सवाला सुरुवात होत असून पुढे अजून 10 दिवस म्हणजेच 26 जानेरारीपर्यंत नवी मुंबईकरांसाठी ही मेजवानी असणार आहे.

विविध समाज प्रबोधनात्मक कार्यक्रमांबरोबरच संस्कृतीदर्शक चित्र प्रदर्शन, खाद्य संस्कृती, भव्य फनफेअर हे या महोत्सवाचे खास आकर्षण ठरणार आहे. तसेच येथील ग्रामसंस्कृती, लोककला व लोकपरंपरेचे जतन व्हावे, नवोदित कलावंतांना हक्काचे व्यासपीठ मिळवून देतानाच जुन्या जाणत्या कलावंतांचा गुणगौरव व्हावा, ग्रामसंस्कृती आणि नागर संस्कृती यांच्यामध्ये वैचारिक आदान-प्रदान व्हावे, सांप्रदायिक एकता व एकात्मता वृद्धिंगत व्हावी, हाच उद्देश समोर ठेवून या कार्यक्रमाचे आयोजन करण्यात येते. हा महोत्सव हा निशुल्क असल्याने नागरिकांनी मोठ्या संख्येने सहभागी व्हावे व महोत्सवाचा आनंद लुटावा, असे आवाहन बेलापूर विधानसभा क्षेत्राच्या आमदार मंदाताई म्हात्रे यांनी केले आहे.

कार्यक्रम
शनिवार 18 जानेवारी सांय 5 ते 7 वाजता चित्रकल/मेहंदी स्पर्धा व सांय 7 ते 9 वाजता आगरी कोळी गीतांचा लाईव्ह कार्यक्रम, रविवार दि. 19 जानेवारी सांय 7 वाजता आशीमिक कामठे प्रस्तुत लावणी महोत्सव, सोमवार दि. 20 जानेवारी सांय 5 ते 7 वाजता पाककला स्पर्धा व सांय 7 ते 10 आम्ही दोघे राजाराणी (होम मिनिस्टर), मंगलवार दि. 21 जानेवारी सांय 7 ते 10 शालेय समूह नृत्य स्पर्धा, बुधवार दि. 22 जानेवारी सांय 7 ते 10 महामानवाची संगीतमय गाथा, गुरुवार दि. 23 जानेवारी सांय 7 ते 10 वाजता हिंदी गीतांचा कार्यक्रम प्रमुख पाहुणे पद्मश्री शंकर महादेवन, शुक्रवार दि. 24 जानेवारी सांय 7 ते 10 मराठमोळा फॅशन शो, हास्यकल्लोळ, समूह नृत्य व वेशभूषा स्पर्धा, शनिवार दि. 25 जानेवारी सकाळी 9 ते दु. 2 वाजता महाआरोग्य शिबीर व सांय 6 ते 10 वारसा माझ्या महाराष्ट्राचा, रविवार दि. 26 जानेवारी सांय 6 ते 10 वाजता धमाल मराठी लावणी कोळी गीते या सर्व विविध कार्यक्रम आपणांस अनुभवयास व पहावयास मिळणार आहे.