Breaking News
मुख्यलेखा व वित्त अधिकारी पदावरुन गरडांची गच्छंती; सिडको एमडींचा दणका
नवी मुंबई ः काही महिन्यांपुर्वी नवी मुंबई महापालिकेतून बदली होऊन सिडकोत मुख्यलेखा व वित्त अधिकारी पदावर रुजू झालेले धनराज गरड यांना सिडको एमडींनी दणका दिला आहे. त्यांचा मुख्यलेखा व वित्त अधिकारी पदभार काढून त्यांना वित्त सल्लागार म्हणून नेमणुक केली आहे. यामुळे सिडकोतील ‘धन'राजावर अंकुश बसला असल्याची चर्चा सिडकोत दबक्या आवाजात सुरु आहे.
सिडको व्यवस्थापकीय संचालक यांनी नुकताच सिडकोतील काही अधिकाऱ्यांना अतिरिक्त कार्यभार दिला असून काहींकडून महत्वाचा कार्यभार काढून घेण्यात आला आहे. यामध्ये मुख्यलेखा व वित्त अधिकारी धनराज गरड यांच्याकडे कंपनी सचिव, आर्थिक सल्लागार आणि अर्थ व्यवस्थापक पदांचा पदभार होता. मात्र सिडको एमडी संजय मुखर्जी यांनी त्यांच्याकडील आर्थिक सल्लागार हे एकच पद ठेवून इतर पदांवरुन त्यांचा कार्यभार कमी केला आहे. त्यांच्या जागी कनिष्ठ अधिकाऱ्यांची नेमणुक केल्याने गरड यांना मोठा धक्का दिल्याचे बोलले जाते. पालिकेत असताना गरड यांच्याबद्दल अनेक तक्रारी पालिका आयुक्तांना प्राप्त होऊनही त्यांनी कोणतीही कारवाई धनराजांवर करण्यास स्वारस्य दाखवले नाही. परंतु मुखर्जी यांनी त्यांना मिळालेल्या तक्रारीच्या अनुषंगाने तत्काळ कारवाई केल्याचे बोलले जात आहे. हा फरक थेट आयएएस व पदोन्नतीने झालेल्या आयएएस अधिकाऱ्यांमध्ये असल्याची चर्चा सध्या जोरात आहे. मुखर्जी यांनी गरड यांच्याबरोबर फैयाज खान यांना त्यांच्याकडील महाव्यवस्थापक (गृह) तसेच व्यवस्थापक (कार्मिक) पदाचा अतिरिक्त पदभार असून आता नव्याने कंपनी सचिव पदाची जबाबदारी दिली आहे. लेखा अधिकारी अस्मिता दळवी यांना मुख्यलेखा व वित्त अधिकारी पदाचा अतिरिक्त पदभार देण्यात आला आहे. लालमिया शेख यांना त्यांच्या संख्याशास्त्रज्ञ पदासोबतच अर्थ व्यवस्थापनाची जबाबदारी दिली आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai