Breaking News
पनवेल : पनवेल भाजपचे वादग्रस्त माजी नगरसेवक, आरपीआय (आठवले गट) जिल्हाध्यक्ष जगदीश गायकवाड यांना वादग्रस्त वक्तव्य केल्याबाबत कळंबोली पोलिसांनी बुधवारी (ता. 30) अटक केली. पनवेल न्यायालयात हजर केले असता न्यायालयाने जामीन मंजूर केला; मात्र न्यायालयाबाहेर येताच कर्जत पोलिसांनी गायकवाड यांना अटक केली. न्यायालयाबाहेर गायकवाड यांनी पोलिसांच्या अंगावर गाडी घालण्याचा प्रयत्न केला.
भारतरत्न डॉ. बाबासाहेब आंबेडकर यांचे नातू वंचित बहुजन आघाडीचे राष्ट्रीय अध्यक्ष प्रकाश आंबेडकर यांच्याबाबत त्यांनी वादग्रस्त वक्तव्य केले आहे. वंचित बहुजन आघाडीचे कार्यकर्ते नितीन गायकवाड यांनी दिलेल्या तक्रारीनुसार गुन्हा दाखल झाला आहे. बुधवारी कळंबोली पोलिसांनी गायकवाड यांना अटक करून न्यायालयात हजर केले. गायकवाड यांना अटक करण्यासाठी कर्जत पोलिस न्यायालयाबाहेर उपस्थित होते. या वेळी गायकवाड स्वतःकडील गाडीत बसण्याच्या तयारीत असताना कर्जत पोलिस अटक करण्यासाठी पुढे सरसावले; परंतु गायकवाड यांनी पसार होण्यासाठी पोलिसांच्या अंगावर गाडी घालण्याचा प्रयत्न केला; मात्र कर्जत पोलिसांनी ताब्यात घेतले. 22 नोव्हेंबरला जगदीश गायकवाड आणि 15 जणांच्या जमावाने एका व्यक्तीस मारहाण केल्याप्रकरणी ही अटक करण्यात आली.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai