Breaking News
नवी मुंबई : शालेय मुलांना शारिरिक व मानसिकदृष्ट्या सुदृढ ठेवण्यासाठी चला खेळ खेळूया या कार्यशाळे अंतर्गत विस्मृतीत गेलेले बैठे आणि मैदानी खेळ मुलांना शिकवण्याकरिता आपला कट्टा संस्थेअंतर्गत येत्या 25 डिसेंबर रोजी एकदिवसीय कार्यशाळेचे आयोजन ऐरोली येथे करण्यात आले आहे. एक दिवसीय कार्यशाळेत मुलांचा मानसिक व शारीरिक विकास कसा करता येईल यासाठी निमंत्रित तज्ञांच्या मार्फत मार्गदर्शन केले जाणार असल्याची माहिती कार्यशाळेचे आयोजक तथा प्रशिक्षक पंकज भोसले यांनी दिली.
आज काल पालकांची तक्रार असते की, आमची मुलं वेळेत झोपत नाहीत. तासं न तास मोबाईल वर असतात. पण करोना काळात शिक्षण घेण्यासाठी हाच मोबाईल त्यांचा मित्र झाला हे देखील तितकच खरं आहे. आता मात्र प्रत्येक पालकांना या मोबाईलचे गैरफायदे देखील दिसायला लागले आहेत. स्मरणशक्तीची कमतरता, सतत होणारी चीडचीड, चिंता, संवाद समस्या, लहान वयात डोळ्यांवरील चष्मा आणि मुख्यत्वे झोप न लागणे ही सर्व लक्षणे मुलांमध्ये दिसू लागली आहेत.
परिणामी पालकांना भविष्यात आपल्या पाल्याच्या संगोपनासाठी विशेष तयारी करावी लागणार आहे. त्यांना शारिरिक व मानसिकदृष्ट्या सुदृढ ठेवण्यासाठी वेगवेगळे उपाय अवलंबवावे लागणार आहेत. त्याकरिता मुलांना परत मैदानाकडे घेऊन जाणे ही काळाची गरज ठरली आहे. म्हणूनच80 च्या दशकात जे खेळ आपण खेळत होतो तेच खेळ याचा उत्तम पर्याय ठरु शकतात. लगोरी, गोट्या, भोवरे, विषामृत, आट्यापाट्या, लमाण लंगडी या सारखे विविध मैदानी खेळ शारिरिक श्रम घडवतात. हे खेळ मुलांबरोबर पालकांनी देखील खेळायला हवेत. एकटेपणा दूर होऊन ज्या खेळांमुळे संवाद वाढतो, असे बैठे खेळ संपुर्ण कुटुंबाने एकत्रित खेळले पाहिजेत. आपला कट्टा संस्था गेली 9 वर्षे हेच खेळ या नव्या पिढीला शिकवत आहे. चला खेळ खेळूया या कार्यशाळेअंतर्गत हेच विस्मृतीत गेलेले लगोरी, आट्यापाट्या, काठ्याकाठ्या , लामण लंगडी, गाडा-गाडा, गुंफ्याचा खेळ, विषामृत या विविध पारंपारिक मैदानी खेळांचे प्रशिक्षण या कार्यशाळेत दिले जाणार आहे. तसेच मंकला, बाघवाल, पट, चदुरंग, मोक्षपट, आठचल्लस या सारखे विविध बैठे खेळ देखील शिकवले जाणार आहेत. या कार्यशाळेचे आयोजन के. भास्कर घाडी मैदान, चिंचवली गार्डन शेजारी, से-5 ऐरोली येथे 25 डिसेंबर 2022 सकाळी 8 ते सायं. 4 पर्यंत होणार असून अधिक माहितीसाठी 9821009137 , 9730977579, 8097326699 या भ्रमणध्वनींवर संपर्क साधण्याचे आवाहन आयोजकांनी केले आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai