बेलापूर-गेट वे वॉटर टॅक्सी सुरु

by Aajchi Navi Mumbai
Feb 09, 2023
78

नवी मुंबई ः नवी मुंबईकरांना प्रतिक्षा असणारी बेलापुर ते गेट वे ऑफ इंडिया वॉटर टॅक्सीचा प्रवास मंगळवारपासून सुरु झाला आहे. बंदरे व खनीकर्म मंत्री दादा भुसे यांच्या हस्ते या सेवेचा प्रारंभ करण्यात आला. या सुविधेमुळे नवी मुंबईकरांना मुंबईपर्यंतचा प्रवास अवघ्या 50 मिनिटांत करता येणार आहे.

बेलापूर जेट्टी ते भाऊचा धक्का अशी प्रवासी सेवा सुरू होती मात्र कालांतराने ती बंद पडल्याने नवी मुंबईपासून मुंबईसाठी जलवाहतुकीचा पर्याय असावा, यासाठी विविध माध्यमातून प्रयत्न सुरू होते. अखेर बेलापूर जेट्टी ते गेटवे ऑफ इंडिया या ॉटर टॅक्सीच्या उपक्रमाचा शुभारंभ करण्यात आला. मुंबई पोर्ट ट्रस्ट व केंद्र सरकार यांच्या संयुक्त उपक्रमातून सुरू झालेल्या सेवेचा शुभांरभ राज्यमंत्री दादा भुसे यांच्याहस्ते करण्यात आला. या वेळी वॉटर टॅक्सी प्रवासी सेवेतून स्थानिकांना रोजगार कसा मिळेल, याकडे अधिक लक्ष देणार असल्याचे मत त्यांनी मांडले. यावेळी बेलापूरच्या आमदार मंदा म्हात्रेंसह बंदरे विकास विभागाचे प्रधान सचिव पराग जैन, मुख्य कार्यकारी अधिकारी अजित सैनी, नयनतारा कंपनीचे रोहित सिन्हा यांच्यासह विभागाचे अधिकारी उपस्थित होते.

मुंबईच्या मंत्रालयासह फोर्ट भागात विविध कामांनिमित्त दररोज ये-जा करणारे नोकरदार आणि व्यावसायिकांसाठी ही सेवा उपयुक्त ठरणार असल्याचे भुसे यांनी यावेळी स्पष्ट केले आहे. तिचे प्रवासभाडेही 250 ते 350 रुपयांच्या दरम्यान आहे. गेटवे ऑफ इंडियाच्या जवळच रेडिओ क्लब जेट्टीवरून प्रवासी वाहतूक सुरू करण्यास केंद्र शासनाने मान्यता दिली आहे. त्यानुसार या जेट्टीवरून लवकरच विविध मार्गांवर जलवाहतूक सेवा सुुरू केली जाणार असल्याचे भुसे यांनी यावेळी स्पष्ट केले. वॉटर टॅक्सीच्या दिवसांतून सध्या दोनच फेऱ्या होणार आहेत. शनिवार आणि रविवार वगळता दरदिवशी सकाळी 8.30 वाजता बेलापूर जेट्टीहून वॉटर टॅक्सी सुटेल. ती सकाळी 9.30 वाजता गेटवे ऑफ इंडियाला पोहचेल. गेटवे ऑफ इंडियाहून सायंकाळी 6.30 वाजता वॉटर टॅक्सी सुटेल. ती सायंकाळी 7.30 वाजता बेलापूर जेट्टीवर पोहोचेल. प्रवाशांचा प्रतिसाद पाहून फेऱ्या वाढविण्यात येणार आहेत.

या जलमार्गामुळे दीड तासांचा प्रवास 50 ते 55 मिनिटांवर येणार आहे. त्यामुळे प्रवाशांना जास्तीत जास्त सेवा देण्याचा प्रयत्न करणार आहोत. तसेच या सुविधेमुळे रस्त्यांवरचा ताण कमी होणार असून वेळही वाचणार आहे. - दादा भुसे, बंदरे व खनीकर्म मंत्री