Breaking News
निवडणुक आयोगाचा उद्धव ठाकरेंना धक्का
मुंबई ः केंद्रिय निवडणुक आयोगाने ठाकरे सेना व शिंदे सेना यांच्या वादावर शुक्रवारी निर्णय जाहीर केला आहे. आयोगाने शिवसेना हे नाव व धनुष्यबाण चिन्ह शिंदे गटाला बहाल केले आहे. उद्धव ठाकरे यांना हा मोठा धक्का मानला जात असून या निर्णयाला आपण न्यायालयात आव्हान देणार असल्याचे ठाकरे शिवसेनेच्यावतीने सांगण्यात आले आहे.
शिवसेनेचे विधीमंडळाचे गटनेते एकनाथ शिंदे यांनी जून 2022 मध्ये बंडखोरी करुन भाजपसोबत राज्यात सरकार स्थापन केले होते. जुलै 2022 मध्ये त्यांनी केंद्रिय निवडणुक आयोगाकडे शिवसेना आपली असल्याचा दावा करुन शिवसेना नाव व धनुष्यबाण चिन्ह आपल्याला द्यावे अशी मागणी केली होती. त्यावेळी केंद्रिय निवडणुक आयोगाने शिवसेना नाव व धनुष्यबाण चिन्ह गोठवून ठाकरे व एकनाथ शिंदे यांना स्वतंत्र नाव व चिन्ह बहाल केले होते.
जानेवारी 2023 मध्ये केंद्रिय निवडणुक आयोगासमोरील शिवसेना कोणाची? या वादावरील सुनावणी पुर्ण होवून त्यावरील निर्णय राखून ठेवला होता. शुक्रवारी केंद्रिय निवडणुक आयोगाने आपला निर्णय जाहीर केला असून शिवसेना हे नाव व धनुष्यबाण हे चिन्ह शिंदे यांना बहाल केले आहे. हा निर्णय देताना केंद्रिय निवडणुक आयोगाने मुख्यमंत्री एकनाथ शिंदे यांच्याबाजुने असलेल्या लोकप्रतिनिधींची संख्या विचारात घेतल्याचे आपल्या आदेशात नमुद केले आहे. निवडणुक आयोगाचा हा निर्णय उद्धव ठाकरे यांना मोठा धक्का मानला जात असून ते याबाबत पुढील कोणता निर्णय घेतात याकडे शिवसैनिकांचे व महाराष्ट्राचे लक्ष लागले आहे. हा विजय बाळासाहेबांच्या व धर्मवीर आनंद दिघे यांच्या विचारांचा असल्याची प्रतिक्रिया शिंदे गटाकडून देण्यात आली आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai