नेरुळ येथील पालिका रुग्णालयास आयुक्तांची भेट

1 फेब्रुवारीपासून सर्जिकल वॉर्ड व शस्त्रक्रिया सुरु करण्याचे नियोजन 

नवी मुंबई ः नेरुळ व ऐरोली येथील रुग्णालयांत 1 जानेवारीपासून आयसीयू व मेडिसीन वॉर्ड सुरु करण्याचे लक्ष्य ठेवले आहे. त्यानुसार निर्देशांची अंमलबजावणी किती प्रमाणात झाली याची पाहणी करण्यासाठी आयुक्त अभिजीत बांगर यांनी नेरुळ येथील माँसाहेब मिनाताई ठाकरे रुग्णालयास अचानक भेट दिली. यावेळी स्वच्छतेवर अधिक भर देण्याचे सांगितले असून रेकॉर्ड रूम अद्ययावत करण्याचे निर्देश दिले. काही अग्निशमन उपकरणांचा वापर कालावधी संपुन गेल्याचे निदर्शनास आल्याने आयुक्तांनी तीव्र नाराजी व्यक्त केली. 

या भेटीदरम्यान सध्या सुरु असलेल्या आरोग्य सेवांची पहाणी करत असताना तेथे सुरू असलेल्या बाह्यरूग्ण सेवांमध्ये नेत्रचिकित्सा, कान-नाक-घसा तपासणी, त्वचाविकार, मानसोपचार, मेडिसीन या बाह्यरुग्ण सेवाही सुरु करण्याची गरज लक्षात घेऊन आयुक्तांनी 1 जानेवारीपर्यंत या बाह्यरुग्ण सेवाही सुरु करण्यासाठी आवश्यक मनुष्यबळ पुर्तता करण्याचे निर्देश आरोग्य विभागाला दिले. ऐरोली प्रमाणेच नेरुळ रुग्णालयातही कोव्हीड पश्चात उपचारकेंद्र सुरु असून त्याची माहिती नागरिकांना होण्यासाठी व्यापक स्वरूपात प्रसिध्दी करण्याच्या सूचना देण्यात आल्या. सध्या कोव्हीड बाधीत होणार्‍यांची संख्या कमी झाली असली तरी कोव्हीड बाधीत होऊन गेल्यानंतर वैद्यकीय सेवेची गरज असणार्‍यांची संख्या मोठी आहे. त्यामुळे अशा नागरिकांसाठी महानगरपालिकेची उपचार सेवा रूग्णालयात उपलब्ध असल्याची माहिती जास्तीत जास्त नागरिकांपर्यंत पोहचविण्याकरिता दर्शनी भागात फलक लावणे तसेच विविध माध्यमांचा उपयोग करण्याचे निर्देश आयुक्तांनी दिले. याशिवाय नेरुळ रुग्णालयात डायलिसीस सेवा उपलब्ध असून तेथील 5 युनिट्सचा पूर्ण क्षमतेने वापर होत नसल्याचे निदर्शनास आल्याने त्याचीही प्रसिध्दी व्यापक स्वरुपात करावी असे आयुक्तांनी सूचित केले. रुग्णालयात पुरेशी स्वच्छता आहे मात्र त्यामध्ये अधिक सुधारणा करण्याच्या व तेथे नागरिक मोठ्या प्रमाणात येत असल्याने प्रामुख्याने स्वच्छता गृहांच्या नियमित स्वच्छतेवर अधिक भर देण्याचे निर्देश आयुक्तांनी दिले. बालरोग वॉर्डमध्ये दाखल होणारी रुग्णसंख्या सध्या कमी दिसत असून त्याबाबतही अधिक चांगल्या रुग्णसेवेवर भर देण्याचे आयुक्तांनी सूचित केले. रुग्णालयाच्या रेकॉर्ड रूमच्या सद्यस्थितीबाबत नाराजी व्यक्त करीत संबंधितांना समज देण्यात आली तसेच 15 दिवसात अभिलेख अधिनियमानुसार रेकॉर्ड रूम अद्ययावत करण्याचे निर्देश देण्यात आले. पूर्ण क्षमतेने स्टरलायझेशनच्या खरेदी करण्यात आलेल्या मोठ्या मशीन्स विनावापर पडून असल्याने त्यांचा वापर विनाविलंब सुरू करावा असेही निर्देश आयुक्तांनी दिले. 

रूग्णालयामध्ये 1 जानेवारीला पुरुष व महिलांसाठी प्रत्येकी 15 बेड्सचे मेडिकल वॉर्ड व 10 बेड्सचा आयसीयू वॉर्ड सुरु करण्यासाठी आवश्यक ती संपूर्ण कार्यवाही करण्याची जबाबदारी वैद्यकीय अधिक्षकांची असेल असे पुन्हा एकवार स्पष्ट करीत आयुक्त  अभिजीत बांगर यांनी पुढच्या टप्प्यात 1 फेब्रुवारी पासून सर्जिकल वॉर्ड व सर्व प्रकारच्या शस्त्रक्रिया सुरु करण्याचेही नियोजन असल्याचे स्पष्ट केले.  

फायर एक्स्टिंग्युशर आऊट ऑफ डेट
या पाहणी दौर्‍यात फायर एक्स्टिंग्युशर या काही अग्निशमन उपकरणांच्या वापर कालावधीची मुदत उलटून गेल्याचे निदर्शनास आल्याने याविषयी तीव्र नाराजी केली. आयुक्तांनी त्याबाबत तातडीने कार्यवाही करण्याचे निर्देश देत जबाबदारी निश्चित करण्याचे आदेशित केले आहे.