उरणमध्ये बंद केलेली एनएमएमटीची सेवा सुरु करा

उरणमध्ये बंद केलेली एनएमएमटीची सेवा सुरु करा

by Aajchi Navi Mumbai
Feb 27, 2024
128

उरण ः उरण मध्ये येण्यासाठी तसेच उरण मधून बाहेर इतर ठिकाणी जाण्यासाठी प्रवासाचे सर्वात चांगले व सुरक्षित व विश्वसनीय सेवा म्हणून नवी मुंबई महानगरपालिकेच्या परिवहन सेवेकडे बघितले जाते. मात्र नुकत्याच घडलेल्या मारहानीच्या घटनेमुळे वाहक आणि चालकांच्या सुरक्षेखातर 22 फेब्रुवारी 2024 पासून कोणतेही पूर्व सूचना न देता उरण तालुक्यातील सेवा बंद केली आहे. ही सेवा तात्काळ सुरु करावी अशी मागणी नागरिकांसह सर्व राजकीय पक्षांनी केली आहे.

कोपरखैरणे ते उरण 31 नंबर, कळंबोली ते उरण 30 नंबर,जुईनगर ते वशेणी 34 नंबर अशी सेवा उरण मध्ये सुरू होती. मात्र काही दिवसांपूर्वी खोपटे येथे बसने अपघात केला.यात एकाचा मृत्यू झाला तर 4 जण गंभीर जखमी झाले होते. तेव्हा बस ड्रायवरला एका खोलीत डांबून ठेवण्यात आले होते. तसेच त्या वाहन चालक व ग्रामस्थांमध्ये वाद झाला होता. या घटनेत ड्रायव्हर हा दारू पिऊन वाहन चालवत होता असा आरोप ग्रामस्थांनी केला होता. अपघात झाल्यानंतर वाहन चालकाला मारहाण झाल्यानंतर एनएमएमटीच्या सर्व ड्रायव्हर कंडक्टर तसेच कर्मचाऱ्यांनी संप सुद्धा केला होता. या घटनेची गंभीर दखल घेत तसेच एन एम एम टी प्रशासनाने बसेसचे चालक व वाहक यांची सुरक्षा लक्षात घेता उरण मधील एनएमएमटीची सेवा बंद केली आहे.

उरण मार्गावर दिवसभरात सुमारे 7000 हुन अधिक प्रवाशी प्रवास करतात. मात्र एनएमएमटीची सेवा बंद झाल्याने या सर्व नागरिकांना विविध समस्यांना सामोरे जावे लागत आहे. शिवाय खाजगी वाहने मनमानी कारभार करत प्रवासासाठी कितीही पैसे घेत आहेत त्यामूळे याचा थेट फटका प्रवाशांना बसत आहे. यामुळे प्रवाशांचा वेळ वे पैसे दोन्ही अधिक खर्च करावा लागत आहे. उरणमध्ये अजूनही दळणावळणाच्या पाहिजे तशा सेवा नाहीत. त्यामुळे अचानकपणे बंद केलेली एनएमएमटी बसच्या सुविधा पुन्हा सुरू कराव्यात, उरण तालुक्यात एनएमएमटीचे बस सुरू कराव्यात अशी मागणी उरणच्या जनतेतून होऊ लागली आहे.

बस मार्ग क्र. 30, 31 व 34 बसेस अचानकपण बंद केल्याने नोकरी, व्यवसाय, काम-धंदा, शिक्षण व कार्यालयीन कामानिमित्त दररोज नवी मुंबई कडे जाणाऱ्या येणाऱ्या हजारो प्रवाश्यांचे हाल होत आहेत व आर्थिक नुकसान होत आहे. दहावी व बारावीचे वार्षिक परीक्षा सुरु आहेत, विद्यार्थ्यांचे शैक्षणिक नुकसान होत आहे. ही सार्वजनिक सुविधा तातडीने सुरु केली नाही तर आंदोलन करण्यात येईल असा इशारा भारताचा कम्युनिस्ट पक्ष (मार्क्सवादी )तर्फे नवी मुंबई महानगर पालिका व एनएमएमटी प्रशासनाला पत्रव्यवहाराद्वारे देण्यात आला आहे.