Breaking News
नवी मुंबई ः राज्यात सेनेच्या बंडखोर शिंदे गटाने भाजपशी युती करुन सत्ता स्थापन केली असली तरी हा फॉर्म्युला नवी मुंबईत पालिका निवडणुकीत राबवणे अशक्य आहे. नवी मुंबईत महाविकास आघाडी, बंडखोर शिवसेना व भाजप अशी तिरंगी लढत होण्याची शक्यता असल्याने महापालिका निवडणुकीत शिंदे गटाचा ‘विजय’ खडतर मानला जात आहे.
नवी मुंबई महापालिकेत गेली 30 वर्ष गणेश नाईक यांनी निरंकुश सत्ता उपभोगली आहे. यावेळी राज्यात सत्तांतर होण्यापुर्वी गणेश नाईक यांची सत्ता नवी मुंबई महापालिकेतून जाईल असे वातावरण होते. परंतु, एकनाथ शिंदे यांनी बंडखोरी करुन राज्यात भाजप व बंडखोर शिवसेनेचे नवीन सरकार अस्तित्वात आणले. शिंदे यांनी बंडखोरी केल्यानंतर नवी मुंबई शिवसेनेतील अनेक माजी नगरसेवकांनी शिंदे गटात प्रवेश केला आहे. त्यामध्ये प्रामुख्याने ऐरोलीतील चौगुले गटाचा समावेश आहे. शिवसेना उपनेते विजय नाहटा यांनीही शिवसेेनेला जय महाराष्ट्र करुन शिंदेंची साथ दिल्याने गणेश नाईक यांची महापालिका निवडणुकीत बाजू मजबुत झाली आहे.
दिघ्यातील गवते कुटुंबियांनी पुन्हा भाजपात प्रवेश केल्याने ऐरोलीतून अधिक जागा मिळवण्याच्या नाईक गटाच्या आशा पल्लवित झाल्या आहेत. शिवसेनेतील लोकप्रतिनिधी शिंदे गटात तर पदाधिकारी व कार्यकर्ते उद्धव ठाकरेंसोबत असल्याचे चित्र राज्यात असल्याने नवी मुंबईत बंडखोरी केलेल्या सेना उमेदवारांचे राजकीय भवितव्य अधांतरी राहणार आहे. या दुफळीचा फायदा होणार असल्याने शिंदे गटासोबत गणेश नाईक युती करण्याची शक्यता कमी असल्याने शिंदे गटातील अनेक नगरसेवक पुन्हा नाईकांसोबत जाण्याची शक्यता वर्तवली जात आहे. त्यामुळे नवी मुंबईत शिंदे गटाचा विजय खडतर मानला जात आहे. दरम्यान, मध्यंतरी वाशी येथील उड्डाणपुल बांधण्याच्या कामावरुन एकनाथ शिंदे आणि गणेश नाईक यांच्यात रंगलेल्या कलगीतुर्यावरुन भविष्यात शिंदे-नाईक जवळ येण्याची शक्यता नाही. परंतु, फडणवीसांनी दबाव टाकल्यास शिंदे गटासोबत नाईक यांना जुळवून घ्यावे लागेल असे बोलले जात असले तरी स्वाभिमानी नाईक त्यास कितपत महत्व देतात याकडे नवी मुंबईकरांचे लक्ष लागले आहे.
पालिका निवडणुकीत भाजप आणि शिंदे गट एकत्र येण्याची अपेक्षा असतानाच नाईकांनी गवते कुटुंबियांना भाजपात दिलेला प्रवेश योग्य नाही. त्यामुळे नाईकांनी वर्तन सुधारले नाही तर भविष्यात आम्ही दिलेले धक्के त्यांना भारी पडतील - विजय चौगुले
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai