होर्डिंग, मोबाईल टॉवर्सच्या सुरक्षिततेचा अहवाल सादर करा

होर्डिंग, मोबाईल टॉवर्सच्या सुरक्षिततेचा अहवाल सादर करा

by Aajchi Navi Mumbai
May 18, 2024
352

पालिका आयुक्तांचे संबंधित अधिकारीवर्गाला निर्देश

नवी मुंबई ः सोमवारी आलेल्या आकस्मिक वादळामुळे व पर्जन्यवृष्टीमुळे नवी मुंबई महापालिका क्षेत्रात उद्भवलेली आपत्तीजनक परिस्थिती तसेच मुंबईतील घाटकोपर येथे घडलेली मोठे होर्डिंग्ज कोसळल्याची दुर्घटना याचे गांभीर्य लक्षात घेऊन पालिका आयुक्त डॉ. कैलास शिंदे यांनी मंगळवारी तातडीने दूरदृश्य प्रणालीव्दारे अधिकारीवर्गाची बैठक घेत शहरातील परिस्थिती जाणून घेतली तसेच 247 सतर्क राहण्याचे निर्देश दिले. अनधिकृत जाहिरात फलक निष्कासीत करण्याचे तसेच होर्डिंगप्रमाणेच मोबाईल टॉवर्सच्या सुरक्षिततेबाबतही सर्वेक्षण करुन अहवाल सादर करण्याचे निर्देश आयुक्तांनी दिले.

सोमवारी सायं 4.05 पासून 5.35 पर्यंत ताशी 107 कि.मी. वेगाने वादळी वाऱ्यांसह अकाली पर्जन्यवृष्टी सुरु झाली. आयुक्तांच्या निर्देशानुसार पालिकेची सर्व यंत्रणा0 क्षेत्रीय स्तरावर मदत कार्यासाठी तात्काळ कार्यान्वित झाली आणि 8 वाजेपर्यंत वादळामुळे पडलेली झाडे व फांदया, दोन ठिकाणी वाकलेले विजेचे खांब, काही ठिकाणी उडालेले पत्रे यावर कार्यवाही करत रहदारीचे अडथळे दूर करुन जनजीवन सुरळीत करण्यात आले. पालिकेच्या विभागीय स्तरावर तत्पर कार्यवाही झाल्याने आणि नागरिकांना बचाव व मदतीचा तात्काळ संदेश निर्गमित झाल्याने समाधान व्यक्त करण्यात आले. घाटकोपर येथे होर्डिंग कोसळण्याची घडलेली दुर्घटना लक्षात घेत नमुंमपा क्षेत्रातील अंतर्गत भागात तसेच महामार्ग, रेल्वे हद्द, एमआयडीसी भागात लावण्यात आलेल्या होर्डिंग स्वरुपातील जाहिरात फलकांचे रचनात्मक परीक्षण करण्याच्या यापूर्वीच दिलेल्या निर्देशाची अंमलबजावणी झाली असल्याची खातरजमा करुन घ्यावी अशा स्पष्ट सूचना आयुक्तांनी दिल्या.

नवी मुंबई पालिका क्षेत्रात असलेल्या एकूण होर्डेिगची संख्या, त्यांचे आकारमान, त्यामधील परवानगी दिलेल्या होर्डिंंगची संख्या याची माहिती त्वरीत संकलित करुन सादर करावी तसेच अधिकृत होर्डिंगवर ते अधिकृत असल्याचे चिन्ह प्रदर्शित करण्याची कार्यवाही करणे त्याचप्रमाणे अवैध/अनधिकृत जाहिरात फलक निष्कासनाची कार्यवाही करण्याचे आयुक्तांमार्फत सूचित करण्यात आले. जाहिरात फलक कोसळून होणाऱ्या दुर्घटना टाळण्यासाठी वादळी वारे, अतिवृष्टी अशा नैसर्गिक आपत्तीसमयी नागरिकांनी जाहिरात फलकाच्या आजूबाजूला थांबू नये असे आवाहन व्यापक स्वरुपात प्रसारित करण्यात यावे असे आयुक्तांनी सूचित केले. होर्डिंगप्रमाणेच ठिकठिकाणी असलेल्या मोबाईल टॉवर्सच्या सुरक्षिततेबाबतही सर्वेक्षण करुन अहवाल सादर करण्याचे आयुक्तांमार्फत निर्देश देण्यात आले. या वादळी कालावधीत अनेक ठिकाणी गच्चीवरील, घरांवरील पत्रे उडाले असल्याचे निदर्शनास आले असून याबाबत काळजी घेण्याच्या सूचना सोसायटयांना व वसाहतींना देण्यात याव्यात असेही आयुक्तांनी सूचित केले. नमुंमपा क्षेत्रात नैसर्गिक नालेसफाई सुरु असून त्या कामाला गती देण्याचे निर्देश देत आयुक्तांनी नाल्यातून काढला जाणारा गाळ काहीसा सुकल्यानंतर त्वरीत उचलून नेण्याचे सूचित केले. अतिरिक्त आयुक्त सुनिल पवार व शहर अभियंता संजय देसाई यांनी संयुक्त पाहणी करुन नालेसफाई पूर्ण करुन घ्यावी असेही आयुक्तांनी निर्देशित केले.

नाही तर आंदोलन
मुंबईमधील होर्डिंग दुर्घटनेच्या पार्श्वभूमीवर भगत यांनी पत्रकार परिषद आयोजित केली होती. गतवर्षी मुंबई-बंगळुरू महामार्गावर पुणे येथे होर्डिंग कोसळून पाच जणांचा मृत्यू झाला होता. या घटनेपासून नवी मुंबई महानगरपालिकेकडे अनधिकृत होर्डिंग्जवर कारवाईसाठी पत्रव्यवहार करत आहे. तत्कालीन आयुक्तांनी पत्रावर कारवाईचा शेराही मारला होता. परंतु, वर्षभरात प्रशासनाने प्रत्यक्षात काहीही कारवाई केलेली नाही. नवी मुंबई परिसरामध्ये अनेक अनधिकृत होर्डिंग आहेत. नियमांची पायमल्ली करून सिग्नलवर व इतर ठिकाणी ती उभी केली आहेत. यामुळे भविष्यात अपघात होण्याची शक्यता आहे. तक्रारी करूनही होर्डिंग्जविरोधात वर्षभरात ठोस कारवाई केली नाही. आता तत्काळ कारवाई सुरू केली नाही तर आंदोलन करण्याचा इशाराही नामदेव भगत यांनी दिला. तसेच अनधिकृत होर्डिंग्जला पाठीशी घालणाऱ्यांवरही कारवाई करण्याची मागणी त्यांनी केली आहे.