दिवाळी खरेदीसाठी बाजारात झुंबड

दिवाळी खरेदीसाठी बाजारात झुंबड

नागरिकांची एपीएमसी मार्केटला पसंती ; सजावटीच्या वस्तूंची रेलचेल

नवी मुंबई : तोंडावर आलेल्या दिवाळी सणासाठी बाजार सजला असून खरेदीसाठी ग्राहकांची झुंबड होत आहे. कोरोनाचे निर्बंध शिथील झाल्याने नागरिकही मरगळ झटकून खरेदीला लागले आहेत. अनेक सजावटींच्या विविध आकर्षक वस्तूंची रेलचेल बाजारात पाहायला मिळत आहे. वाशीतील एपीएमसी मार्केटला नागरिकांनी खरेदीसाठी विशेष पसंती देत असल्याचे पाहायला मिळत आहे.

गेल्या वषी कोरोनाच्या भीतीच्या आणि तणावाच्या छायेत काढल्यानंतर यंदा प्रत्येकालाच दिवाळीसण मोठ्या उत्साहात साजरा करायचा आहे. सांयकाळी खरेदीसाठी नागरिक बाहेर पडू लागले आहेत. बाजार सजावटीच्या साहित्यांनी फुलून गेला आहे. दिवाळीचे उस्ताही वातावरण पहावयास मिळत आहे. बाजारामध्ये दिवाळीसाठी लागणारे विविध प्रकारचे आकर्षक, रंगीबेरंगी प्लास्टिकचे, कापडाचे पर्यावरणपूरक आकाशकंदील; पणत्या, विविध प्रकारच्या एलईडी विद्युत माळा, रांगोळी, तोरण इत्यादी साहित्य विक्रीसाठी मोठ्याप्रमाणात आले आहे. एलईडी दिव्यांच्या रोषणाईमुळे बाजार परिसर उजळून निघाला आहे. कोरोनाकाळात मोठ्या प्रमाणात झालेले नुकसान भरून काढण्यासाठी व्यापारी सरसावले आहेत. जास्तीत जास्त ग्राहकांना आर्कषित करण्यासाठी विविध प्रकारच्या सवलती दुकांनदारांकडून दिल्या जात आहेत.

भाजणीचे पीठ, चकली मसाले, चिवडा, करंज्या-लाडू-शंकरपाळ्या बनविण्यासाठी लागणारे साहित्य आणि सुकामेवा एपीएमसीमधून खरेदी करण्याकडे नागरिकांचा कल वाढत चालला आहे. शहरातील इतर बाजारांमध्ये सुद्धा खरेदीसाठी सायंकाळी झुंबड उडत असल्याने कोरोनाचे नियम पायदळी तुडवले जात आहे. नागिरकांच्या तोंडावरील मास्क आता हनुवटीवर आला आहे. काहींच्यांतर हनुवटीवरुन सुद्ध मास्क गायब झाला आहे. सोशल डिस्टंसिगचे तीनतेरा वाजले आहेत. नवी मुंबईमध्ये 18 वर्षावरील नागरिकांचे 100 टक्के लसीकरण झाले असल्यामुळे थोडी बेफिकीरी वाढली आहे.

ऑनलाईन खरेदीला नागरिकांची पसंती
घरबसल्या खरेदीला बहुतांश नागरिकांची पसंती मिळत आहे. दिवाळीनिमित्त अनेक कंपन्यांकडून ऑनलाईन खरेदीवर सवलतींचा वर्षाव होत आहे. बाजारभावापेक्षा अनेक पटींनी कमी किंमतीत वस्तू मिळत असल्याने ऑनलाईन खरेदीकडे नागरिक वळू लागले आहेत.
कापड मार्केटमध्ये गर्दी
दिवाळीच्या पार्श्वभूमीवर कपड्यांचे दर वाढलेले असल्यामुळे ऐन सणासुदीच्या काळात ग्राहकांच्या खिशावर अतिरिक्त ताण पडत आहे. असे असून सुद्धा शहरातील कापड बाजारांमध्ये खरेदीसाठी नागरिकांची गर्दी वाढत चालली आहे. व्यापार्‍यांकडून ग्राहकांना आकर्षित करण्यासाठी रेडिमेड कपड्ड्यांवरती विविध सवलती दिल्या जात आहेत. ग्राहकही या सवलतींचा फायदा घेताना दिसत आहे.
रेडिमेड फराळ महागला
पेट्रोल-डिझेल दरात झालेली वाढ, सतत वाढलेल्या गॅसच्या किंमती, आवाक्याबाहेर गेलेले तेलाचे दर व फराळ बनविण्यासाठी लागणार्‍या वस्तू महाग झाल्या आहेत. त्याचा परिणाम रेडिमेड फराळाच्या किमंतीवर झाला आहे. रेडिमेड दिवाळी फराळ महागला आहे. फराळांचे भाव नाईलजास्तव वाढवावे लागले असल्याचे विक्रेत्यांचे म्हणणे आहे. सणाच्या गोडव्यामध्ये भर टाकणार्‍या मिठाईच्या किंमती सुद्धा वाढल्या आहेत.