Breaking News
मोठ्या बंदोबस्तात पालिका-सिडकोची कारवाई
नवी मुंबई : कोपरखैरणे रेल्वे स्थानक परिसरात मोठ्या प्रमाणात अतिक्रमण करण्यात आले होते. 2018 मध्ये येथे कारवाई करण्यासाठी गेलेल्या पथकावर दगडफेक झाली होती. त्यामुळे गुरुवारी मोठ्या बंदोबस्तात पालिका आणि सिडकोने संयुक्त कारवाई करुन 116 बेकायदा झोपड्या जमीनदोस्त केल्या. यामुळे परिसराने मोकळा श्वास घेतला आहे.
कोपरखैरणे रेल्वे स्थानकाबाहेरील सिडकोच्या भूखंडावर या बेकायदा झोपड्या उभ्या राहिल्या आहेत. त्यांनी पदपथासह रस्ताही काबीज केला होता. या झोपडपट्टीवासीयांचे काही दैनंदिन व्यवहार हे उघड्यावरच सुरू असतात. रात्रीच्या वेळी तर रस्त्यालगत झोपलेले असतात. यामुळे अपघाताची शक्यता असून वाहतुकीलाही मोठा अडथळा होत असतो. 2018 मध्ये सिडको आणि महापालिका यांनी संयुक्त कारवाई केली होती. मात्र या कारवाईला विरोध करीत झोपडपट्टीवासीयांनी पोलिसांवर दगडफेक केली होती. जेसीबीची देखील तोडफोड केली होती. यात दोन पोलीस आधिकारी जखमी झाले होते. त्यावेळी दंगलसदृश्य परिस्थिती निर्माण झाल्याने गुरुवारी महापालिकेच्या अतिक्रमण विभागाने मोठया बंदोबस्तात कोपरखैरणे रेल्वे स्थानकाबाहेरील रस्त्यालगतच्या झोपडयांवर तोडक कारवाई केली. यात सुमारे 116 बेकायदा झोपड्या निष्कासित केल्याचे पालिका प्रशासनाने सांगितले. यापूर्वीही अनेकदा कारवाई करण्यात आली आहे. मात्र पुन:पुन्हा या झोपड्या उभ्या राहत असल्याने हा प्रश्न गंभीर झाला आहे. त्यामुळे मोठ्या बंदोबस्तात कारवाई करण्यात आली. या ठिकाणच्या भूखंडावर नवीन इमारतीचे बांधकाम सुरू आहे. त्यामुळे या झोपडपट्टीधारकांनी उर्वरित भूखंड आणि पदपथावर बस्तान मांडले आहे. याठिकाणी शाळा महाविद्यालये आहेत. तसेच वाशी, तुर्भे कोपरखैरणेला जोडणारा मुख्य रस्ता आहे. त्यामुळे याठिकाणी वाहनांची वर्दळ असते. परंतु बेकायदा झोपड्या पदपथावर उभारल्याने पादचार्यांना अडचणी येत आहेत. त्यामुळे गुरुवारी पालिका व सिडको प्रशासनाने 250-300 जणांच्या पोलीस बंदोबस्तात या झोपड्यांवर कारवाई केली. 25 ते 30 अधिकारीही यावेळी उपस्थित होते. शंभरहून अधिक झोपड्या या वेळी निष्कासित करण्यात आल्या. ही कारवाई होणार असल्याने पोलिसांनी परिसरातही मोठा बंदोबस्त ठेवला होता. वाहतुकीचे मार्गही बदलण्यात आले होते. परिसरातील सर्व दुकानेही बंद ठेवण्यात आली होती.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai