Breaking News
मुंबईच्या बैठकीला 28 विरोधी पक्षांची उपस्थिती
मुंबई ः आगामी लोकसभा निवडणुकीच्या अनुषंगाने इंडिया आघाडीने मुंबईत आयोजित केलेल्या बैठकीला 28 पक्षांनी आपली उपस्थिती दर्शविली. मुंबईतल्या ग्रँड हयात हॉटेलमध्ये झालेल्या बैठकीत इंडिया आघाडीने एनडीए विरुद्ध रणशिंग फुंकले आहे. यावेळी आघाडीची 14 सदस्यीय समन्वय समिती स्थापन करण्यात आली असून ‘जुडेगा भारत, जीतेगा भारत' या मोहिमेचा प्रचार आणि प्रसार करण्याचा निर्धार पत्रकार परिषदेत जाहीर केला. महाराष्ट्रातून 2024 च्या लोकसभांच्या निवडणुकीचे बिगुल वाजवले गेल्याने त्यास विशेष महत्व प्राप्त झाले आहे.
मोदी-शहा सरकारला आसमान दाखवण्यासाठी काँग्रेस पक्षाने देशातील सर्व प्रादेशिक पक्षांना एकत्र आणत ‘इंडिया' ही आघाडी स्थापन केली आहे. या आघाडीत देशभरातून 28 पक्ष सामिल झाले असून मोदी सरकारला हटवणे आणि देशात लोकशाही व सर्वसमभाव पुन्हा रुजवणे हे मुळ उद्दिष्ट या आघाडीने समोर ठेवले आहे. देशात अनेक राज्यात सुरु असलेल्या धार्मिक हिंसाचार, केंद्र सरकारची दडपशाही, ईडी-सीबीआय या संस्थांचा गैरवापर त्याचबरोबर वाढती महागाई व बेरोजगारी या मुद्द्यांवर आगामी लोकसभा निवडणुक लढवण्याचे लक्ष सर्वच विरोधी पक्षांनी निश्चित केले आहे. या बैठकीला तृणमुल काँग्रेसच्या ममता बॅनर्जी, जेडीयूचे नेते नितीशकुमार, जेडीएसचे नेते लालूप्रसाद यादव, शिवसेना पक्षप्रमुख उद्धव ठाकरे, तामिळनाडूचे मुख्यमंत्री स्टॅलिन, आपचे प्रमुख अरविंद केजरीवाल, समाजवादी पक्षाचे अखिलेश यादव व काँग्रेस पक्षाचे अध्यक्ष मल्लिकार्जुन खरगेंसह सोनिया गांधी व राहुल गांधी हे उपस्थित होते. इंडिया आघाडीच्या बैठकीचे आयोजन महाविकास आघाडीकडून करण्यात आले.
गुरुवारी रात्र आणि शुक्रवारी दुपारी तीन वाजेपर्यंत अनेक विषयांवर चर्चा झाली. या बैठकांमध्ये सर्व सहमतीने इंडिया आघाडीची 14 सदस्यीय समन्वय समिती स्थापन करण्यात आली आहे. त्याचबरोबर कॅम्पेन कमिटी, वर्किंग ग्रुप ऑफ सोशल मीडिया, वर्किंग ग्रुप ऑफ मीडिया आणि वर्किंग ग्रुप ऑफ रिसर्च या चार समितींची देखील स्थापना करण्यात आली आहे. सर्व पक्षांच्या नेत्यांचा या कमिटींमध्ये समावेश करण्यात आल्याचे संजय राऊत यांनी बैठकीनंतर झालेल्या पत्रकार परिषदेत सांगितले. या व्यासपीठावर उपस्थित असलेले पक्ष देशाच्या 60 टक्के लोकसंख्येचे प्रतिनिधित्व करतात, या एकजुटीमुळे भाजपचा पराभव निश्चित आहे असे काँग्रेस खासदार राहुल गांधी यांनी सांगितले.
इंडियाच्या बैठकीतले ठराव
‘जुडेगा भारत, जीतेगा भारत' ची रणनिती
देशात सध्या धार्मिक तेढ निर्माण झाली असून अविश्वासाचे वातावरण धर्माधर्मांत, जातीपातीत, पसरल्याने देश एकसंध राखण्यासाठी ‘जुडेगा भारत, जीतेगा भारत' या घोषणेने विविध राज्यात रॅली काढण्यात येणार आहे. या रॅलीत जनतेला भेडसावणाऱ्या महागाई व बेरोजगारी या मुद्द्यांवर प्रामुख्याने भर दिला जाणार असल्याचे ठरवण्यात आले.
समन्वय समितीचे सदस्यांची नावे
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai