सिडकोचा 16,250 कोटींचा अर्थसंकल्प

सिडकोचा 16,250 कोटींचा अर्थसंकल्प

by Aajchi Navi Mumbai
Apr 10, 2026
20

पायाभूत सुविधा, कनेक्टिव्हिटी आणि गृहनिर्माणावर भर

नवी मुंबई ः सिडको महामंडळाने सन 2026-27 या आर्थिक वर्षासाठी रु. 16,250 कोटींचा अर्थसंकल्प सादर केला असून नवी मुंबई तसेच परिसरातील नियोजित शहरी विकासाला चालना देण्यासाठी पायाभूत सुविधा विस्तार, प्रादेशिक कनेक्टिव्हिटी बळकटीकरण आणि गृहनिर्माण विकासावर विशेष भर देण्यात आला आहे. सिडकोने रु. 9,774,23 कोटींचे सुधारित उत्पन्न आणि रु. 9,770.26 कोटींचा खर्च नोंदवला असून रु. 3.97 कोटींचा अधिशेष साध्य केला आहे.

सिडकोच्या नुकत्याच झालेल्या संचालक मंडळाच्या बैठकीत या अर्थसंकल्पाला मंजुरी देण्यात आली. सिंघल यांनी सादर केलेल्या अर्थसंकल्पानुसार 16,150 कोटी रुपये खर्च अपेक्षित असून 100 कोटी रुपयांची शिल्लक राहणार आहे. 2026-2027 या आर्थिक वर्षात सिडकोच्या तिजोरीत सुमारे 3 हजार कोटी रुपयांच्या ठेवी आहेत. सिडकोला घरविक्रीतून सिडकोला 6,777 कोटी रूपयांचे उत्पन्न मिळण्याचा अंदाज वर्तवलेला आहे. तसेच मेट्रोच्या तिकीट भाडे व इतर उत्पन्नातून 21 कोटी रुपये, पाणीपट्टी शुल्क सुमारे 100 कोटी रुपये जमा होण्याचा अंदाच व्यक्त केला आहे. नवीन शहर, रेल्वे प्रकल्प आणि नैना प्रकल्प यातून मिळणारे उत्पन्न हे 369 कोटी रुपये मिळण्याचा अंदाज वर्तवलेला आहे. खर्चाच्या बाबी लक्षात घेता सिडकोचे सुरू असलेले प्रकल्पांसाठी आणि ठेवी व इतर सामान्य खर्चासाठी सिडकोने 8293 कोटी रूपये या खर्चात दर्शविले आहेत. तसेच सिडकोच्या महागृहनिर्माणासाठी 3,337 कोटी रूपये खर्च करण्याचे नियोजन केले आहे. पाणी पुरवठा व इतर जलप्रकल्पांसाठी 1,769 कोटी रूपये सिडको खर्च कऱणार आहे. तसेच नवीन वसाहत, नैना प्रकल्पातील पायाभूत सुविधांच्या उभारणीसाठी आणि रेल्वे यासाठी 2486 कोटी रुपये खर्चाची तरतूद ठेवली आहे. मेट्रो प्रकल्पासाठी 265 कोटी रूपयांची तरतूद केली आहे.

सन 2026-27 साठीचा सिडकोचा अर्थसंकल्प पायाभूत सुविधा, दळणवळण आणि दर्जेदार गृहनिर्माणाबाबतच्या आमच्या वचनबद्धतेला अधिक बळकटी देणारा आहे. नवी मुंबई आंतरराष्ट्रीय विमानतळ, एरोसिटीचा विकास तसेच प्रस्तावित एज्यु सिटी आणि मेडिसिटी, यासोबत मेट्रो लाईन 8 व लाईन 2 द्वारे वाढलेले दळणवळण, तसेच प्रस्तावित आंतरराष्ट्रीय कॉर्पोरेट पार्क आणि इतर धोरणात्मक विकास उपक्रमांच्या जोरावर नवी मुंबई एक प्रमुख आर्थिक व गुंतवणूक केंद्र म्हणून उदयास येण्यास सज्ज आहे. -विजय सिंघल, उपाध्यक्ष तथा व्यवस्थापकीय संचालक, सिडको

वित्तीय वर्ष 2025-26 मधील उल्लेखनीय आणि महत्त्वपूर्ण कामगिरी

नवी मुंबई आंतरराष्ट्रीय विमानतळ
गतवर्षातील एक महत्त्वपूर्ण टप्पा म्हणजे नवी मुंबई आंतरराष्ट्रीय विमानतळाचे कार्यान्वयन होय. या विमानतळाचे उद्घाटन 8 ऑक्टोबर 2025 रोजी भारताचे पंतप्रधान नरेंद्र मोदी यांच्या हस्ते करण्यात आले असून दि. 25 डिसेंबर 2025 पासून देशांतर्गत विमानसेवा सुरू झाली आहे. सध्या दररोज 76 शहरांसोबत सुमारे 150 विमानांद्वार वाहतूक सुरू असून सुमारे 19,000 प्रवाशांची दररोज वाहतूक होत आहे. एप्रिल 2026 अखेरीस आंतरराष्ट्रीय विमानसेवा सुरू होण्याची अपेक्षा आहे.

प्रमुख पायाभूत सुविधा व कनेक्टिव्हिटी प्रकल्प

मेट्रो लाईन 8 :
छत्रपती शिवाजी महाराज आंतरराष्ट्रीय विमानतळ ते नवी मुंबई आंतरराष्ट्रीय विमानतळ जोडणारी 34.89 किमी लांबीची मेट्रो लाईन 8 विकसित करण्यात येत असून त्यामध्ये 20 स्थानके असतील. 2031 पर्यंत या मार्गावर दररोज सुमारे 9.8 लाख प्रवाशांची वाहतूक अपेक्षित आहे.
नवी मुंबई मेट्रो विस्तार:
सिडकोने मेट्रो लाईन 1ए (बेलापूर-एनएमआयए, 3.2 किमी) आणि मेट्रो लाईन 2 (पेंढार-एनएमआयए टर्मिनल-4, 15 किमी) या मार्गांसाठी सविस्तर प्रकल्प अहवाल तयार केला असून त्यामुळे नवी मुंबई मेट्रो नेटवर्क विमानतळाशी जोडले जाणार आहे.

ठाणे-एनएमआयए एलिव्हेटेड कॉरिडॉर:
सिडकोकडून ठाणे ते नवी मुंबई आंतरराष्ट्रीय विमानतळ दरम्यान 25.3 किमी लांबीचा सहा पदरी एलिव्हेटेड कॉरिडॉर उभारण्यात येत आहे. रु. 6,521 कोटींच्या अंदाजित खर्चाचा हा प्रकल्प झझझ मॉडेलअंतर्गत राबविण्यात येत असून त्यामुळे ठाणे ते विमानतळ प्रवासाचा कालावधी सुमारे 90 मिनिटांवरून 30 मिनिटांपर्यंत कमी होणार आहे.

आयकॉनिक इनडोअर लाईव्ह एंटरटेनमेंट अरेना:
सिडकोकडून नवी मुंबईमध्ये सुमारे 20,000 आसन क्षमतेचा, आंतरराष्ट्रीय दर्जाचा अत्याधुनिक इनडोअर लाईव्ह एंटरटेनमेंट अरेना विकसित करण्यात येत आहे. या प्रकल्पाला गुंतवणूकदारांकडून उत्स्फूर्त प्रतिसाद मिळाला असून, अनेक निविदा प्राप्त झाल्या आहेत व अंमलबजावणीच्या पुढील टप्प्याची प्रक्रिया सुरू आहे.

खारघर व्हॅली गोल्फ कोर्स:
खारघर व्हॅली गोल्फ कोर्सचा 9 होलवरून आंतरराष्ट्रीय दर्जाच्या 18 होलच्या चॅम्पियनशिप गोल्फ कोर्समध्ये विस्तार करण्यात आला आहे.

युनिटी मॉल :
नवी मुंबईमध्ये वन डिस्ट्रिक्ट वन प्रॉडक्ट उपक्रमाला प्रोत्साहन देण्यासाठी तसेच प्रादेशिक हस्तकला, संस्कृती आणि स्थानिक उत्पादनांना व्यासपीठ उपलब्ध करून देण्यासाठी युनिटी मॉल विकसित करण्यात येत आहे.

थीम आधारित विकास प्रकल्प
सिडकोतर्फे नवी मुंबई विमानतळाभोवती विशेष आर्थिक जिल्ह्यांच्या माध्यमातून आयकॉनिक सिटी डेव्हलपमेन्ट धोरण राबविण्यात येत आहे.
एरोसिटी:
सुमारे 270 हेक्टर क्षेत्रात एरोसिटी विकसित करण्यात येणार असून त्यामध्ये व्यावसायिक जिल्हे, आतिथ्य सुविधा, परिषद केंद्रे आणि मिश्र वापराचे शहरी विकास प्रकल्प असतील.

एड्युसिटी:
करंजाडे परिसरात सुमारे 100 हेक्टर क्षेत्रात विकसित होणाऱ्या एड्युसिटीमध्ये 10 पर्यंत जागतिक दर्जाच्या विद्यापीठांना स्थान देण्याची योजना आहे. सिडकोने युनिव्हर्सिटी ऑफ यॉर्क, युनिव्हर्सिटी ऑफ अबर्डीन, इलिनॉय इन्स्टिट्यूट ऑफ टेक्नॉलॉजी, युनिव्हर्सिटी ऑफ वेस्टर्न ऑस्ट्रेलिया आणि आयईडी इस्तितुतो युरोपेओ दी डिझाईन यांसारख्या आंतरराष्ट्रीय संस्थांबरोबर सामंजस्य करार केले असून, नवी मुंबईला जागतिक शिक्षण केंद्र म्हणून विकसित करण्याच्या दृष्टीने हा महत्त्वाचा टप्पा ठरत आहे.
मेडिसिटी:
सुमारे 100 हेक्टर क्षेत्रात प्रस्तावित मेडिसिटीमध्ये अत्याधुनिक रुग्णालये, क्रीडा वैद्यक केंद्रे, संशोधन सुविधा आणि वैद्यकीय तंत्रज्ञान अधोसंरचना विकसित करण्यात येणार आहे.

नवी मुंबई विमानतळ प्रभाव अधिसूचित क्षेत्र (नैना)
सिडकोकडून नवी मुंबई विमानतळ प्रभाव अधिसूचित क्षेत्र (नैना) हा एक महत्त्वाचा प्रकल्प विकसित केला जात असून, आधुनिक पायाभूत सुविधा व परवडणाऱ्या गृहनिर्माणाच्या माध्यमातून नियोजित शहरी विस्ताराला गती दिली जात आहे.

आर्थिक पायाभूत सुविधा
आंतरराष्ट्रीय कॉर्पोरेट पार्क खारघर:
खारघर येथे 155 हेक्टर क्षेत्रात आंतरराष्ट्रीय कॉर्पोरेट पार्क विकसित करण्याची योजना असून येथे कॉर्पोरेट कार्यालये, आयटी सेवा, परिषद सुविधा आणि व्यावसायिक क्षेत्र विकसित करण्यात येणार आहे.

इंटिग्रेटेड लॉजिस्टिक्स पार्क:
जेएनपीए आणि नवी मुंबई आंतरराष्ट्रीय विमानतळ दरम्यान 560 हेक्टर क्षेत्रात इंटिग्रेटेड लॉजिस्टिक्स पार्क विकसित करण्याचा प्रस्ताव असून आधुनिक गोदामे, कंटेनर फ्रेट स्टेशन आणि पुरवठा साखळी सुविधा उभारण्यात येणार आहेत.

प्रादेशिक विकास व पाणीपुरवठा
सिडकोकडून नवी मुंबई विमानतळ प्रभाव क्षेत्र सुमारे 225 चौ.किमी क्षेत्रात विकसित करण्यात येत असून भविष्यातील शहरी विकासाला चालना मिळणार आहे.

जलसुरक्षेसाठी प्रकल्प:

कोंढाणे धरण - 350 एमएलडी
हेटवणे धरण - 150 ते 270 एमएलडी
बालगंगा धरण - 350 एमएलडी

कोंढाणे धरण जलावर्धन वितरण व्यवस्था प्रकल्पासाठीची निविदा प्रक्रिया अंतिम टप्प्यात आहे. तसेच सिडकोने टनेल बोरिंग मशीनच्या साहाय्याने एका महिन्यात सुमारे 812 मीटर टनेल खोदण्याचा राष्ट्रीय विक्रम प्रस्थापित केला आहे.