वाशीतील अनधिकृत 305 झोपड्यांवर महापालिकेचा हातोडा

वाशीतील अनधिकृत 305 झोपड्यांवर महापालिकेचा हातोडा

by Aajchi Navi Mumbai
Oct 16, 2026
25

केरला भवनसमोरील हायटेन्शन वायरखालील अतिक्रमण हटविले; दोन दिवस धडक मोहीम

नवी मुंबई : वाशी गाव परिसरातील सेक्टर-30 येथील केरला भवनसमोरील भूखंडावर उभारण्यात आलेल्या अनधिकृत झोपड्यांविरोधात नवी मुंबई महानगरपालिका आणि सिडकोच्या वतीने धडक निष्कासन मोहीम राबविण्यात आली. हायटेन्शन वीजवाहिन्यांखालील महापालिका व सिडकोच्या जागेवर वसलेल्या या झोपड्यांवर 8 आणि 9 ऑक्टोबर रोजी कारवाई करण्यात आली. या दोन दिवसांत एकूण 305 अनधिकृत झोपड्या निष्कासित करण्यात आल्या.

वाशी विभागातील केरला भवनसमोरील भूखंडावर मोठ्या संख्येने झोपड्या उभारण्यात आल्या होत्या. या झोपड्या हायटेन्शन वीजवाहिन्यांखालील जागेवर असल्याने या परिसरातील अतिक्रमण हटविण्यासाठी प्रशासनाकडून मोहीम राबविण्यात आली. शासकीय व सार्वजनिक वापरासाठी असलेल्या जागांवरील अनधिकृत बांधकामे हटविण्याच्या कारवाईचा भाग म्हणून ही मोहीम हाती घेण्यात आली. या कारवाईदरम्यान 8 ऑक्टोबर रोजी 145 झोपड्या, तर 9 ऑक्टोबर रोजी 160 झोपड्या निष्कासित करण्यात आल्या. अशा प्रकारे दोन दिवसांत एकूण 305 झोपड्या हटविण्यात आल्या. कारवाईसाठी एक जेसीबी यंत्राचा वापर करण्यात आला. नियोजनबद्ध पद्धतीने राबविण्यात आलेल्या या मोहिमेत संबंधित भूखंडावरील अतिक्रमण हटविण्यावर भर देण्यात आला. ही धडक मोहीम यशस्वीपणे राबविण्यासाठी नवी मुंबई महानगरपालिकेच्या वाशी विभाग कार्यालयातील अधिकारी व कर्मचारी, स्थानिक पोलीस, अतिक्रमण पोलीस, सुरक्षा रक्षक आणि मजूर सहभागी झाले होते. कारवाईदरम्यान आवश्यक मनुष्यबळ आणि यंत्रसामग्री तैनात करण्यात आली होती. महापालिका आणि सिडकोच्या जागांवरील अनधिकृत बांधकामे तसेच अतिक्रमणांचा प्रश्न नागरी व्यवस्थापनाच्या दृष्टीने महत्त्वाचा ठरत आहे. विशेषतः हायटेन्शन वीजवाहिन्यांखालील जागांचा वापर करताना सुरक्षिततेचे नियम पाळणे आवश्यक असते. या पार्श्वभूमीवर केरला भवनसमोरील भूखंडावरील अतिक्रमण हटविण्यासाठी करण्यात आलेली ही कारवाई महत्त्वाची मानली जात आहे.