मंडप परवानगीसाठी ऑनलाईन सेवा सुरु

मंडप परवानगीसाठी ऑनलाईन सेवा सुरु

by Aajchi Navi Mumbai
Jul 14, 2022
810

परवानगीच्या प्रक्रियेबाबत उद्या पदाधिकार्‍यांची बैठक ; गणेशोत्सव व नवरात्रोत्सवकरीता मार्गदर्शक सूचना

नवी मुंबई ः सार्वजनिक गणेशोत्सव व नवरात्रोत्सवामध्ये अवलंबावयाच्या प्रक्रियेबाबत मागील वर्षी दि 29 जून 2021 अन्वये शासनाच्या गृह विभागाकडील परिपत्रकातील मार्गदर्शक सूचनांनुसार कार्यवाही करावयाची आहे. मंडप परवानगीच्या अर्जासाठी 14 जुलै पासून ऑनलाईन सेवा सुरु करण्यात आली आहे. मार्गदर्शक सूचनांनुसार सण साजरे करण्याचे आवाहन पालिकेने केले आहे.

गणेशोत्सव/नवरात्रौत्सव मंडळे व नागरिक यांनी नवी मुंबई महापालिकेच्या www.rtsnmmconline.com या वेबसाईटवर गणेशोत्सवामध्ये मंडप उभारणेकरिता परवानगी अर्ज सादर करण्याची मुदत 14 जुलै 2022 पासून कार्यालयीन वेळेमध्ये ऑनलाईन सेवा सुरु करण्यात येत आहे. ऑनलाईन प्रणालीद्वारे दोन्ही उत्सवाच्या 10 दिवस अगोदर परवानगी देणे बंद करण्यात येणार आहे. तसेच परवानगीच्या प्रक्रियेबाबत विभाग स्तरावर 15 जुलै 2022 रोजी सकाळी 11:00 वाजता सर्व विभाग कार्यालयांमध्ये बैठक आयोजित करण्यात येणार असून, मंडळाच्या पदाधिकार्‍यांनी सदर बैठकीस उपस्थित राहण्याचे आवाहन पालिकेने केले आहे.

सार्वजनिक गणेशोत्सवासाठी गणेशोत्सव मंडळांनी महापालिका/स्थानिक प्रशासन यांची, त्यांचे धोरणानुसार यथोचित पूर्वपरवानगी घेणे आवश्यक राहील.
श्रीगणेशाची मूर्ती सार्वजनिक मंडळांकरिता 4 फूट व घरगुती गणेशोत्सव करिता 2 फूटांच्या मर्यादेत असावी.
यावर्षी शक्यतो पारंपारिक गणेशमूर्तीं ऐवजी घरातील धातू/संगमरवर आदी मूर्तींचे पूजन करावे. मूर्ती शाडूची/पर्यावरणपूरक असल्यास त्याचे विसर्जन शक्यतो घरच्या घरी करावे. विसर्जन घरी करणे शक्य नसल्यास नजीकच्या कृत्रिम विसर्जन स्थळी विसर्जन करण्यात यावे.
उत्सवाकरीता वर्गणी/देणगी स्वेच्छेने दिल्यास त्यांचा स्विकार करावा. जाहिरातीच्या प्रदर्शनामुळे गर्दी आकर्षित होणार नाही असे पहावे.
सांस्कृतिक कार्यक्रमांऐवजी आरोग्य विषयक उपक्रम/शिबीरे (उदा.रक्तदान) आयोजित करण्यास प्राधान्य देण्यात यावे
ध्वनी प्रदूषण संदर्भातील नियमांचे व तरतूदींचे पालन करण्यात यावे.
श्रीगणपती मंडपांमध्ये निर्जंतुकीकरणाची तसेच थर्मल स्क्रीनिंगची पर्याप्त व्यवस्था करण्यात यावी.
श्रींच्या आगमन व विसर्जन मिरवणूका काढण्यात येऊ नयेत.
गणेशमूर्तींच्या विसर्जनाकरिता कृत्रिम तलावांची निर्मिती करण्यात यावी.