Breaking News
नोंदणी वैधता कालबाह्य; 302 प्रकल्पांना 729.68 कोटींचे रिकव्हरी आदेश
मुंबई ः निर्धारित वेळेत प्रकल्प पुर्ण न करणार्या व ग्राहकांना ताबा न देणार्या विकासकांना महारेरा प्राधिकरणाने चाप बसवला आहे. महारेराने 2017 ते 2022 या कालावधीत राज्यातील 4389 प्रकल्प व्यपगत केले आहेत. 2022 मधील 609 प्रकल्पांमध्ये पनवेल परिसरातील 47 तर उरण मधील 6 प्रकल्पांचा या यादीत समावेश आहे. तसेच 302 प्रकल्पातील 773 प्रकरणांसाठी 729.68 कोटींचे रिकव्हरी आदेश काढल्याने विकासकांचे धाबे दणाणले आहेत.
राज्यातील बांधकाम व्यवसायात होणार्या फसवणुकीवर अंकुश ठेवणार्या महारेरा प्राधिकरणामुळे ग्राहकांना दिलासा मिळत आहे. प्रकल्पाची नोंदणी करुन तो विहित वेळेत पुर्ण करण्याचे बंधन विकासकांवर आहे. नियम मोडणार्या विकासकांवर नियमानुसार कारवाई करण्याचा अधिकार महारेराकडे आहे. कायद्यात कठोर तरतूद असतानाही अनेक विकासक नियम पाळत नसल्याने ग्राहकांना फटका बसतो. महारेराने विहित वेळेत प्रकल्प पुर्ण न करणार्या व प्रकल्पास मुदतवाढ घेऊन तो पुर्ण करण्यास पुढे न येणार्या विकासकांवर कारवाईचा आसूड ओढला आहे. अनेक विकासकांच्या गृहप्रकल्पांचा व्यपगत म्हणजेच लॅप्स यादीत समावेश करुन कारणे दाखवा नोटीस बजावली आहे. महारेरा नोंदणीची वैधता कालबाह्य झाल्याने 2017 ते 2022 पर्यंतच्या 4389 प्रकल्पांचा या यादीत समावेश आहे. प्रवर्तक यापैकी कोणत्याही प्रकल्पाची जाहिरात, विक्री करू शकत नाही किंवा कोणत्याही प्रकारे कोणताही भूखंड, अपार्टमेंट किंवा इमारत खरेदी करू शकत नाहीत. या यादीमध्ये सर्वाधिक प्रकल्प हे पुणे व कोंकण विभागातील आहेत. पनवेल परिसरातील 47 तर उरण मधील 6 प्रकल्पांचा यात समावेश आहे.
302 प्रकल्पांविरुद्ध 773 प्रकरणांना 729.68 कोटींचे रिकव्हरी आदेश काढले आहे. नियमांनुसार, महारेराच्या आदेशानंतरही एखाद्या विकसकाने पीडित घरखरेदीदारांना नुकसानभरपाई देण्यास अपयशी ठरल्यास, महसूल विभागाकडून रिकव्हरी वॉरंट जारी केले जाते, ज्यामध्ये विकासकाच्या संलग्न मालमत्तेच्या लिलावाची तरतूद आहे. उपनगरी मुंबईमध्ये 75 प्रकल्पांविरुद्ध 330 वॉरंटसह 469.50 कोटींचे वॉरंट काढले आहे. ठाण्यातील 62 प्रकल्पाविरुद्ध 51.61 कोटींचे 119 वॉरंट असून रायगडमध्ये 22 प्रकल्पांत 43 वॉरंट असून 5.23 कोटींची वसूली बाकी आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
मोना माळी-सणस