इनरव्हील क्लबची सामाजिक बांधिलकी

इनरव्हील क्लबची सामाजिक बांधिलकी

by Aajchi Navi Mumbai
Apr 06, 2024
496

नवी मुंबई ः न्यू बॉम्बे स्पोर्ट्स क्लब वाशी येथे इनरव्हील क्लब ऑफ नेरुळ सी साईड क्लबच्या शताब्दी वर्षाच्या निमित्ताने अनेक समाज उपयोगी उपक्रमाचे आयोजन केले होते. शिक्षण, संरक्षण ,संस्कृती व समर्पण शताब्दी पुरस्काराने व्यक्ती व संस्थांना सन्मानित करण्यात आले. तसेच या क्लबच्या माध्यमातून नवी मुंबईतील पाच विभागातील कचरा वेचक भगिनींना प्रत्येकी एक अशा दहा हातगाड्या व एक महिन्याचे रेशन वाटप केले गेले.

इनरव्हिल क्लब ऑफ न्यू बॉम्बे सी साईडच्या अध्यक्ष संगीता घोष यांच्या संकल्पनेतून हे वाटप करण्यात आले होते. या कार्यक्रमासाठी पल्लवी चोस्के इनरव्हिल क्लबच्या जिल्हाध्यक्ष तसेच लक्ष्मी सिंग जिल्हा सचिव व मोना ग्यानी खजिनदार या कार्यक्रमाला प्रमुख पाहुण्या म्हणून उपस्थित होत्या. यावेळी अपेक्षा निरंजन यांना कलाक्षेत्र, नयना आनंद स्पेशल मुलांसाठी काम ,स्नेहल आडे महिला दक्षता, सुजन जेकब बालविश्व व वृषाली मगदूम समाजसेवा अशा वैयक्तिक पुरस्काराने सन्मानित करण्यात आले. तसेच स्त्री मुक्ती संघटना कचरावेचक महिलांना हातगाडी,रायगड येथील जिल्हा परिषद शाळेला शुद्ध पाणी सुविधा, स्पेशल लोकांसाठी काम करणाऱ्या गिरीजा होम यांना सीसीटीव्ही, फॅन व इतर आवश्यक वस्तूंचे वाटप करण्यात आले.

स्त्री मुक्ती संघटनेच्या विश्वस्त वृषाली मगदूम यांनी स्त्री मुक्ती संघटनेच्या माध्यमातून 2000 साली कचरावेचक महिलांचे संघटन झाले असून त्यातील आता अनेक महिला वयस्कर झाल्या आहेत. काहींना आजारपणामुळे कचरा वेचायला जाणे अवघड होत आहे, अशा कळवा, दिघा ,घनसोली बोनसरी व पनवेल विभागातील कचरा वेचक महिलांना हातगाडी मिळाली आहे, कचऱ्यातून बाहेर येऊन छोटा व्यवसाय करून घर चालवणे हे त्यांच्यासाठी खूप प्रेरणादायी व आव्हानात्मक आहे. पण कचरा कामातून बाहेर येण्यास त्या उत्सुक आहेत आणि त्या हे नक्की करतील अशी खात्री आहे असं सांगितले. संगीता घोष यांनी या महिला चहा, वडापाव, भाजी, चायनीज असे पदार्थ बनवून त्यांच्या वस्तीत विक्री करून घर चालवणार आहेत अशा महिलांना मदत करणे हे आमच्या क्लब साठी खूप मोलाचे आहे असे सांगितले. पल्लवी चोस्की यांनी आपल्या भाषणात इनरव्हील क्लबचे हे शताब्दी वर्ष असून या वर्षात क्लबच्या माध्यमातून गरजू महिलांपर्यंत पोहोचण्याचे काम क्लबने केले आहे, यासाठी त्यांचे कौतुक केले पाहिजे, क्लब यापुढेही असे सेवाभावी व समाज उपयोगी कामे करत राहील असं आश्वासन दिले. यावेळी शताब्दी वर्षानिमित्त शताब्दी क्लब कॅलेंडर पंचमित्र याचे प्रकाशन करण्यात आले. इनरव्हील क्लब ऑफ नेरुळ सी साईड क्लबच्या पदाधिकारी अश्विनी नाफडे व शर्मिला जैन यांनी कार्यक्रम आयोजनात परिश्रम घेतले होते.