Breaking News
कोरोना रुग्णांकडे दुर्लक्ष ; चौकशीची मागणी
नवी मुंबई: तळोजा कारागृहात कोरोना विषाणूचा मोठ्याप्रमाणावर फैलाव झाला आहे. त्यामुळे अनेक कैदी कोरोनाबाधित झाले असून प्रशासन मात्र त्यांच्याकडे दुर्लक्ष करत असल्याचा आरोप करण्यात आला आहे. याप्रकरणी तळोजा कारागृहाचे अधीक्षक कौस्तुभ कुर्लेकर यांच्या विभागीय चौकशीची मागणी करण्यात आली आहे.
माहिती अधिकार कार्यकर्ते शकील अहमद यांनी याप्रकरणी मुख्यमंत्री, आरोग्यमंत्री, पोलीस महानिरीक्षक शेरिंग दोरजे आणि पोलीस महानिरीक्षक सुनील रामानंद (जेल) यांच्याकडे तक्रार दाखल केली आहे. या तक्रारीत म्हटल्याप्रमाणे तळोजा कारागृहात कैद्यांचे प्रचंड हाल होत आहेत. अनेक कैद्यांना कोरोनाची लक्षणे जाणवत असूनही तुरुंग प्रशासन त्यांच्याकडे लक्ष पुरवत नाही. मुळात तळोजा तुरुंगात कैद्यांची कोरोना चाचणीच केली जात नाही. कोरोनाच्या उपचाराखाली कोरोनाबाधित कैद्यांना केवळ आयुर्वेदिक औषधे दिली जात आहेत, असे या तक्रारीत म्हटले आहे. गेल्यावर्षी तळोजा कारागृहात चार कैद्यांनी आत्महत्या केली होती. त्यानंतर या मृत कैद्यांच्या नातेवाईकांनी अनेकदा चौकशीची मागणी करुनही त्यांची तक्रार कोणीही ऐकून घेतलेली नाही. 30 एप्रिलला विशाल दसरी या कैद्याचा कोरोनामुळे मृत्यू झाला. त्याला वेळ निघून गेल्यानंतर रुग्णालयात दाखल करण्यात आले. त्यामुळे प्रशासनाने या सगळ्याची दखल घेत तळोजा तुरुंगाची पाहणी करावी, अशी मागणी शकील अहमद यांनी केली आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai