Breaking News
अदानी समुहाला नवी मुंबईतूनही मिळणार धक्का ; मुख्यमंत्र्यांनी दिले चौकशीचे आदेश
नवी मुंबई ः महाराष्ट्र किनारपट्टी प्रभाग व्यवस्थापन प्राधिकरणाने मे. मेस्त्री कंन्स्ट्रक्शन्स कंपनीला दिलेली परवानगी वादात सापडली आहे. 7 डिसेंबर 2022 रोजी विषयपत्रिकेत सदर विषय नसतानाही तातडीचे कामकाज म्हणून त्याचा समावेश करुन मेस्त्री समुहाला नेरुळ येथे गोल्फ कोर्स बांधण्यास दिलेल्या परवानगीचे नव्याने नुतनीकरणास मंजुरी दिली आहे. याबाबत जोरदार टिका झाल्यावर त्याची चौकशी करण्याचे आदेश मुख्यमंत्र्यांनी दिले आहेत.
नेरुळ येथे गोल्फ कोर्स बांधण्याची निविदा प्रक्रिया सिडकोने 2005 साली राबविली होती. गोल्फ कोर्सच्या बदल्यात नेरुळ सेक्टर 60 मधील ब्लॉक सी व डी येथील सुमारे 27000 हजार चौ.मी च्या भुखंडावर रहिवाशी व वाणिज्य वापरातून गोल्फ कोर्ससाठी येणारा खर्च वसूल करण्याची तरतूद सदर निविदेत होती. हे काम मे. मेस्त्री कंन्स्ट्रक्शन कंपनी यांना देण्यात आले होते. या प्रकल्पाला महाराष्ट्र किनारपट्टी प्रभाग व्यवस्थापन प्राधिकरणाने (एमसीझेडएमए)ने दिलेली परवानगी उच्च न्यायालयाने नोव्हेंबर 2018 मध्ये रद्द केली होती. त्याविरोधात सिडकोने सर्वोच्च न्यायालयाकडे स्पेशल लीव्ह पेटिशन दाखल केली असून त्याची सुनावणी प्रलंबित आहे.
एमसीझेडएमएने गोल्फ कोर्ससाठी 7 डिसेंबर 2022 रोजी घेण्यात आलेल्या बैठकीमध्ये उच्च न्यायालयाने रद्द केलेल्या सीआरझेड मंजूरीचे पुन:सत्यापन केले. हा विषय नोव्हेंबरमध्ये जारी केलेल्या आयोजित बैठकीच्या विषयपत्रिकेवर नसतानाही तातडीचे कामकाज म्हणून बैठकीत उपस्थित करुन सदर परवानगीला पुनर्जिवन दिले आहे. नवी मुंबई महापालिका क्षेत्रातील नेरुळ सेक्टर 60 मधील ब्लॉक सी व डी वर बांधकाम करण्याची परवानगी मेस्त्री कंन्स्ट्रक्शन कंपनीला सिडकोने दिली आहे. याबाबत महापालिकेने हरकत नोंदवूनही कोणताही प्रतिसाद सिडको व राज्य सरकारने दिलेला नाही. ब्लॉक सी व डी मध्ये उभे राहत असलेल्या निवासी संकुलाची विक्रि अदानी समुहाच्या नावाने केली जात आहे. त्यामुळे एमसीझेडएमएच्या या निर्णयामागे अदानी समुहाचा दबाव तर नाही ना अशी चर्चा मंत्रालयात आहे. याबाबत तक्रार प्राप्त झाल्याने मुख्यमंत्री एकनाथ शिंदे यांनी पर्यावरण, वने व हवामान बदल विभागाला तातडीने चौकशीचे आदेश दिले आहेत.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai