वाशी ते बेलापूर रेल्वे स्थानकांना नवा साज

वाशी ते बेलापूर रेल्वे स्थानकांना नवा साज

by Aajchi Navi Mumbai
Oct 06, 2018
706

नवी मुंबई ः नवी मुंबई विकसीत केलेल्या सिडकोनेच येथील हार्बर मार्गावर रेल्वे स्थानके उभारली. या रेल्वे स्थानकांना 25 वर्षे होत आल्याने अनेक रेल्वे स्थानकांच्या इमारतीची दुरवस्था झाली आहे. म्हणूनच सिडकोच्या वतीने वाशी ते बेलापूर या मार्गावरील रेल्वे स्थानकांच्या डागडुजीचे आणि

सुशोभिकरणाचे काम हाती घेण्यात आले आहे. त्यामुळे या रेल्वे स्थानकांच्या इमारतींना पुन्हा नवी झळाळी प्राप्त होणार आहे.

सिडकोच्यावतीने 90 कोटी रुपये खर्च करून त्यावेळी या रेल्वे स्थानकांची उभारणी करण्यात आली आहे. सिडकोची ही रेल्वे स्थानके म्हणजे वास्तूशिल्पाचे उत्तम नमुने आहेत. रेल्वे स्थानकांच्या वर व्यवसायिक संकुले ही संकल्पना सिडकोने येथे राबवली आहे. शिवाय सिडकोच्या या रेल्वे स्थानकांमध्ये प्लॅटफॉर्मवर कुठेही खाद्यपदार्थांचे स्टॉल लावण्यात आलेले नाहीत. त्यामुळे मुंबईतील किंवा इतर ठिकाणच्या रेल्वे स्थानकात जाणवणारी समस्या या ठिकाणी जाणवत नाहीत. सुटसुटीत उभारलेली ही स्थानके सर्वांच्या आकर्षणाचे केंद्र ठरली होती.

मात्र हळूहळू योग्य देखभालीअभावी या रेल्वे स्थानकांची दुरवस्था होऊ लागली. इमारतींचा रंगही उडून गेला. अनेक ठिकाणच्या लाद्या निखळल्या आहेत. सीबीडी बेलापूरसारख्या रेल्वे स्थानकात वर्षभर पाणी गळण्याची समस्या आहे. अनेक ठिकाणी रेल्वे स्थानकांच्या खांबाचे प्लास्टर निघून गेले आहे. दोन खांबांत अंतर निर्माण झाले आहे. त्यामुळे रेल्वे स्थानकांची डागडुजी आणि सुशोभिकरण गरजेचे होते. त्यानुसार सिडकोच्या वतीने हे काम हाती घेण्यात आले आहे.

या अंतर्गत बेलापूरपासून वाशीपर्यंतच्या रेल्वे स्थानकांच्या इमारतींना नवा साज चढवला जाणार आहे. सर्व इमारतींना रंगरंगोटी करून ज्या ठिकाणी भिंतीना लावलेल्या लाद्या निखळून गेल्या आहेत त्या ठिकाणी तसाच रंग लावला जाणार आहे.

या कामांना सुरुवात झाली असून सानपाडा, जुईनगर आणि नेरुळ या रेल्वे स्थानकांची कामे प्रगतिपथावर आहेत. वाशी आणि बेलापूर या मोठ्या रेल्वे स्थानकांची कामे आता सुरू करण्यात आली आहेत. या कामासाठी 18 महिन्यांचा कालावधी देण्यात आला आहे. पाणीगळतीची समस्या असलेल्या ठिकाणी वॉटर प्रुफिंगचे काम केले जाणार आहे.