Breaking News
अजित पवार, वळसे पाटील, भुजबळांसह शपथ घेतलेल्या 9 आमदारांचे निलंबन
मुंबई ः देशाच्या राजकारणात तेल लावलेला पेहलवान म्हणून शरद पवार ओळखले जातात. यावेळी पुतणे अजित पवार यांनी त्यांच्याविरुद्ध शड्डू ठोकले आहेत. शरद पवार यांनी राजकीय चातुर्य दाखवत राष्ट्रीय कार्यकारिणीची बैठक दिल्लीत बोलावून अजित पवारांसह शपथ घेतलेल्या 9 जणांना पक्षातून निलंबित केले. त्यामुळे निलंबित झालेला पदाधिकारी पक्षावर दावा ठोकू शकतो का? हा प्रश्न केंद्रिय निवडणुक आयोगापुढे उपस्थित झाला आहे. स्वतःला चाणक्य समजणाऱ्यांना मोठी चपराक त्यांनी या खेळीने दिल्याची चर्चा राजकीय वर्तुळात आहे.
अजित पवार यांच्यावर भाजपने 2014 च्या निवडणुकीदरम्यान 70 हजार कोटींच्या घोटाळ्यांचा आरोप केला होता. त्यावेळी प्रचारादरम्यान फडणवीस यांनी आपले सरकार आल्यावर अजित दादा चक्की पिसींग म्हणत त्यांना तुरुंगात टाकणार असल्याचे सांगितले होते. याच आरोपांची उजळणी पंतप्रधान नरेंद्र मोदी यांनी मध्यप्रदेशमधील जनसभेला संबोधीत करताना केली. यावेळी त्यांनी सिंचन घोटाळा, महाराष्ट्र राज्य सहकारी बँक घोटाळ्याचा उल्लेख करत 70 हजार कोटींचा घोटाळा करणाऱ्यांना जेरबंद करण्याचा इशारा दिला. या इशाऱ्याला घाबरुन अजित पवार यांनी भाजपसोबत जाण्याचा निर्णय घेतल्याची चर्चा देशात आहे. यापुर्वी अशाच पद्धतीने शिवसेना नेते एकनाथ शिंदे यांना गळाला लावल्याचे बोलले जाते.
अजित पवार यांच्याबरोबर छगन भुजबळ, दिलीप वळसेपाटील, आदिती तटकरे, हसन मुश्रीफ, धनंजय मुंडे, धर्मराव अन्नाम, संजय बनसोडे, अनिल पाटील यांनी शपथ घेतली. यापैकी हसन मुश्रीफ यांच्यावर प्रवर्तन निर्देशनालयाने अनेक धाडी टाकल्या आहेत. तर छगन भुजबळ यांना महाराष्ट्र सदन घोटाळ्यात तुरुंगात जावे लागले होते. इतरही 8 जण ईडीच्या रडारवर असल्याचे बोलले जात होते. बंडखोरीनंतर अजित पवार यांनी तातडीने वर्किंग कमिटीची बैठक बोलावून आपली नियुक्ती राष्ट्रीय अध्यक्ष या पदावर केली आहे. त्याचबरोबर त्यांनी राष्ट्रवादी पक्ष आणि चिन्ह आपल्याला मिळावे यासाठी केंद्रिय निवडणुक आयोगाकडे दावा ठोकला आहे. शरद पवार यांनी आपण कोणतीही कायदेशीर लढाई लढणार नसून आपण जनतेच्या दरबारात जावू असे सांगून पवार गटाची दिशाभूल केल्याचे दिसत आहे. अजित पवार यांच्या दाव्याआधी त्यांनी निवडणुक आयोगाकडे कॅव्हेट दाखल करुन कायदेशीर लढाईसाठी आपण तयार असल्याचा संदेश दिला.
शरद पवार यांनी यापुर्वीच शपथ घेतलेल्या 9 जणांची आमदारकी रद्द व्हावी म्हणून सभापती राहूल नार्वेकर यांच्याकडे याचिका दाखल केली आहे. एवढ्यावरच ते थांबले नसून दिल्ली येथे राष्ट्रीय कार्यकारिणीची बैठक बोलावून अजित पवारांसह 9 आमदारांना पक्षातून निलंबित केले. या बैठकीत राष्ट्रीय कार्यकारिणीच्या 25 सदस्यापैकी 22 सदस्य उपस्थित असल्याचे आमदार जितेंद्र आव्हाड यांनी सांगितले. पवारांच्या या निर्णयामुळे अजितदादांना पक्षचिन्ह व पक्षाच्या नावावर आता दावा ठोकता येणार नसल्याचे मत अनेक घटनातज्ञ व्यक्त करत आहेत. पवारांनी एकाच खेळीने 9 जणांचा राजकीय बळी तर घेतलाच त्याचबरोबर उर्वरित बंडखोरांना परतीचे दरवाजे उघडे ठेवल्याचा संदेश दिला आहे. पवारांच्या या राजकीय चलाखीने देशातील तथाकथित चाणक्यांना चांगलाच दणका बसल्याचे बोलले जात आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
संजयकुमार सुर्वे