सिडकोची 27.30 हेक्टरवर टाऊनशीप

सिडकोची 27.30 हेक्टरवर टाऊनशीप

by Aajchi Navi Mumbai
Aug 16, 2024
712

संचालक मंडळाची पीपीपी तत्वावर प्रकल्प उभारण्यास मंजुरी

नवी मुंबई : सार्वजनिक-खाजगी भागीदारीतून ऐरोली येथे 27.30 हेक्टर जमिनीवर टाऊनशिप उभारण्याच्या प्रस्तावास सिडको संचालक मंडळाने मंजुरी दिली आहे. शासनाच्या मंजुरीनंतर निविदा प्रक्रिया राबवण्यात येणार असून जो विकासक ज्यास्त महसुल देईल त्यालाच हे काम देण्याचा निर्णय सदर ठरावात नमुद आहे. पंतप्रधान आवास योजनेअंतर्गत आर्थिक दुर्बल व अल्प उत्पन्न गटासाठी घरे बांधल्यानंतर आता उच्च उत्पन्न घटकांसाठी ही योजना राबवण्याचे सिडकोचे धोरण असल्याची चर्चा आहे.

सिडकोने सध्या नवी मुंबईत भुखंड विक्रिचा सपाटा लावला आहे. सिडकोच्या या भुखंड विक्रिमुळे बाजारात प्रचंड घरे उपलब्ध असून त्यात पंतप्रधान आवास योजनेअंतर्गत आर्थिक दुर्बल व अल्प उत्पन्न घटकांसाठी बांधलेल्या घरांचाही समावेश आहे. सिडकोने ऐरोलीतील सेक्टर 10 येथे 27.30 हेक्टर जमिनीवर सार्वजनिक-खाजगी भागीदारीतून टाऊनशिप उभारण्याचा निर्णय घेतला आहे. यापुर्वी ही जमिन सिडकोने आंतरराष्ट्रीय दुतावासांसाठी राखीव ठेवली होती. परंतु, त्यास सकारात्मक प्रतिसाद न मिळाल्याने सिडकोने नंतर या जागेवर थिम सिटी विकसीत करण्याचे ठरवले होते. परंतु, आता सिडकोने या जागेवर टाऊनशिप उभारण्याचा निर्णय घेऊन तो ठराव शासनाच्या मंजुरीसाठी पाठवला आहे.

सिडकोने हा निर्णय देशातील नामवंत उद्योजकाला नजरेसमोर ठेवून घेतला असल्याची चर्चा सध्या सिडकोत आहे. आजवर सिडकोने अशापद्धतीची कोणतीही योजना राबवली नसल्याने व तसा अनुभव गाठीशी नसल्याने सिडकोचा अधिकारी वर्ग धास्तावला आहे. सिडकोचा कारभार सध्या नगरविकास मंत्र्यांच्या जवळ असलेल्या काही व्यक्तींमार्फत होत असल्याचे बोलले जाते. पनवेलमधील मौजे वळवली येथील सिडकोच्या 36 हेक्टर जमिनीवरील आदिवासी कुटुंबीयांची अतिक्रमणे नियमानुकूल करून स्वतःची दोन हजार कोटींची जमीन वगळण्याचा तुघलकी निर्णय सिडकोने गेल्या वर्षी घेतला याबाबत उलटसुलट चर्चा सध्या मंत्रालयात आहे. पाच वर्षांत नवी मुंबईत सिडको व खाजगी विकासकांची अनेक घरे विक्रीविना पडून आहेत. शिवाय नैना क्षेत्रात नगररचना परियोजनेअंतर्गत 12 शहरे अर्थात टाउनशिप प्रस्तावित आहेत. ही वस्तुस्थिती असताना पीपीपी तत्त्वावरील टाउनशिपचा अट्टाहास कोणाच्या फायद्यासाठी केला जात आहे, असा सवाल उपस्थित होत आहे.

टाऊनशिपचा नाथ नक्की कोण?
ऐरोली येथील प्रस्तावित टाऊनशिप विशिष्ट उद्योग समुहाला देण्याचा घाट नगरविकास विभागाने घातल्याची चर्चा आहे. संबंधित उद्योग समुहाला निविदा विनासायास मिळावी म्हणून तशाच प्रकारच्या अटी घालण्याचा अधिकाऱ्यांवर दबाव टाकला जात आहे. त्यामुळे अधिकारीवर्ग धास्तावला असून या प्रस्तावित टाऊनशिपमागे नक्की कोणत्या नाथाचा हात आहे असा प्रश्न उपस्थित होत आहे.
360 कोटींचा उड्डाणपुल
ऐरोली-घणसोली नोडला पामबीच मार्गाने जोडण्याची योजना सिडकोने केली होती परंतु गेली दोन दशके हे काम अपूर्ण होते. नुकतेच महापालिकेने 360 कोटी खर्चून उड्डाणपुल बांधण्याचे कार्यादेश दिले आहेत त्यामुळे या जमिनीला सोन्याचा भाव येणार आहे.
गोल्फ कोर्सची जमिन अडानी समुहाला
नेरुळ येथील प्रस्तावित गोल्फकोर्स बांधून झाल्यावर त्याचा खर्च पॉकेट डी मधील भुखंड विकसीत करुन वसूल करण्याची अट निविदेत होती. परंतु, गोल्फफोर्स कागदावर असताना सदर भुखंडावर नवी मुंबई महापालिकेचे नियोजन प्राधिकरणाचे हक्क डावलून सिडकोने मे. मेस्त्री कंस्ट्रक्शन कंपनीला बांधकाम परवानगी दिली. अडानी समुह सदर भुखंड विकसीत करत असून सिडकोच्या या मेहरबानीचे गुपित समजण्याइतपत नवी मुंबईकर सुज्ञ आहेत.
अंबानींचा एसईझेड कागदावरच
सिडकोने 2003 साली हिरानंदानी, निखिल गांधी, अविनाश भोसले व वेणुगोपाळ धूत संचालक असलेल्या द्रोणागिरी इन्फ्रास्ट्रक्चर कंपनीला सूमारे 2000 हेक्टर जमिन एसईझेड विकसीत करण्यासाठी दिली होती. नंतर ही जमिन शेअर्सद्वारे मालकीहक्क बदलून अंबानींच्या रिलायन्स समुहाकडे आली. आजही 21 वर्ष उलटून गेल्यावरही एक साधी विट तेथे लावण्यात आली नसून लाखो कोटींची जमिन सिडकोने उद्योगसमुहाच्या घशात घातली. सिडकोच्या अनेक अधिकाऱ्यांनी या कंपनीकडे नोकरी करुन आपले उखळ पांढरे केले.