माता बाल रुग्णालयात इन्फर्टिलिटी, गॅस्ट्रोलॉजी सुविधा मिळणार

माता बाल रुग्णालयात इन्फर्टिलिटी, गॅस्ट्रोलॉजी सुविधा मिळणार

by Aajchi Navi Mumbai
May 08, 2026
18

आरोग्य सुविधा वाढीवर भर देण्याचे आयुक्तांचे निर्देश

नवी मुंबई ः महानगरपालिका रुग्णालयांच्या इमारती सुसज्ज असून तेथील वैदयकीय सुविधांमध्ये वाढ करण्याच्या दृष्टीने नवी मुंबई महानगरपालिकेने वाटचाल सुरु केली असून आयुक्त डॉ.कैलास शिंदे यांनी आरोग्य विभागाच्या घेतलेल्या आढावा बैठकीनंतर रुग्णालयांची प्रत्यक्ष पाहणी करण्यास सुरुवात केली आहे. या अंतर्गत तुर्भे येथील माता बाल रुग्णालय व ऐरोली येथील राजमाता जिजाऊ रुग्णालय मधील सर्व विभागांना भेटी देऊन आयुक्तांनी सेवांमधील गुणवत्ता वाढीच्या दृष्टीने मौलिक सूचना केल्या.

ऐरोली राजमाता जिजाऊ रुग्णालयातील आरोग्य सुविधांचा लाभ जास्तीत जास्त नागरिकांनी घ्यावा यादृष्टीने त्याठिकाणी ईएनटी, ऑर्थो, डेंटल अशा नागरिकांना आवश्यक आरोग्य सुविधा उपलब्ध करून देण्याच्या दृष्टीने कार्यवाही करावी तसेच आगामी काळात इन्फर्टिलिटी ट्रिटमेंट, गॅस्ट्रोलॉजी ट्रिटमेंट अशाही सुविधा उपलब्ध करुन देण्याच्या दृष्टीने ठोस उपाययोजना कराव्यात असे निर्देश आयुक्तांनी यावेळी दिले. महापालिका रुग्णालयांत पोस्ट ग्रॅज्युएट वैदयकीय संस्थेमुळे डॉक्टर्स उपलब्ध आहेत मात्र पॅरामेडिकल स्टाफची कमतरता भासते, ती दूर करण्यासाठी नियोजन करावे व त्याची त्वरीत कालमर्यादित अंमलबजावणी करावी अशाही सूचना आयुक्तांनी यावेळी दिल्या. याप्रसंगी रूग्णांशी संवाद साधत त्यांचेही म्हणणे आयुक्तांनी जाणून घेतले. ऐरोली रुग्णालयात सोनोग्राफी विभागात दोनपैकी एक कर्मचारी रजेवर असल्याने महिलांना जास्त वेळ थांबावे लागले हे लक्षात आल्यानंतर आयुक्तांनी कर्मचाऱ्यांची संख्या वाढविण्याचे निर्देश दिले. रुग्णालयामध्ये पाच सुसज्ज मॉड्युलर ओटी बनविण्यात आले असून त्यांचा संपूर्ण क्षमतेने वापर होण्यासाठी सुविधांचे नियोजन करावे असेही निर्देश आयुक्तांनी दिले. रुग्णांना व नागरिकांना दिला जाणारा आहार हा गुणवत्तापूर्ण असावा तसेच रुग्णांचे डाएट लक्षात घेऊन त्यानुसार बनविण्यात आलेल्या नाश्ता व भोजनाच्या वारनिहाय वेळापत्रकाचे काटेकोर पालन होत असल्याबाबत नियमित खात्री करावी असेही उपहारगृहातील सेवांची व तेथील खादयपदार्थांची प्रत्यक्ष पाहणी केल्यानंतर आयुक्तांनी सूचित केले.

रुग्णांना कमीत कमी वेळेत केसपेपर त्वरित मिळण्यासाठी तसेच रुग्णांचा वैदयकीय तपशील लगेच उपलब्ध होण्यासाठी आधुनिक तंत्रज्ञानाचा प्रभावी उपयोग करुन डिजीटलायझेशनवर भर देण्यात यावा आणि त्याची अंमलबजावणी कालमर्यादित वेळेत पूर्ण करावी अशा सूचना आयुक्तांनी यावेळी दिल्या. ऐरोली रूग्णालयामध्ये ब्लड बँक 15 दिवसात सुरू करावी तसेच ऐरोलीसह तिन्ही रूग्णालयात मिल्क बँक सुविधा सुरू करण्याचे निर्देश आयुक्तांनी यावेळी दिले. गरोदर महिलांमध्ये रक्तक्षयाचे प्रमाण मोठया प्रमाणात दिसून येते ते कमी करण्यासाठी तसेच कमी वजनाच्या बालक प्रसूतीचे प्रमाणही कमी करण्यासाठी यामागील कारणांचा अभ्यास करावा व त्यादृष्टीने उपयायोजना करण्याची कार्यवाही करावी असेही निर्देश आयुक्तांनी यावेळी दिले. समाजाची गरज लक्षात घेऊन आरोग्य सुविधा उपलब्ध करुन दिल्या पाहिजेत व उपलब्ध करुन दिलेल्या आरोग्य सुविधा गुणवत्तापूर्ण असल्या पाहिजेत ही आपली जबाबदारी असून त्यादृष्टीने आरोग्य विभागाने कृतीशील व्हावे असे निर्देश आयुक्त डॉ.कैलास शिंदे यांनी रुग्णालय पाहणी दौऱ्यामध्ये दिले.

एमआरआय सेंटरची पाहणी
नवी मुंबईकर नागरिकांना आवश्यक आरोग्य सुविधा पुरवितानाच महत्वाच्या चाचण्यांसाठी वाशी सार्वजनिक रुग्णालयामध्ये एमआरआय सुविधा काही दिवसातच उपलब्ध करुन दिली जात आहे. त्या सुविधेची पाहणी आयुक्त डॉ.कैलास शिंदे यांनी अतिरिक्त आयुक्त सुनिल पवार व संबधित अधिकारी यांचेसह केली. मेंदू आणि मज्जासंस्था, पाठीचा कणा आणि सांधे, ह्रदय यकृत मूत्रपिंड स्वादुपिंड असे अंतर्गत अवयव, कर्करोग, रक्तवाहिन्यांचे आजार अशा विविध आजारांच्या निदानासाठी एमआरआय चाचणी अत्यंत महत्वाची मानली जाते. साधारणत: 15 हजारापासून अधिक खर्च असलेली ही महाग चाचणी नागरिकांना अत्यंत सवलतीच्या दरात उपलब्ध करुन देण्यात येणार आहे. आरोग्य सेवा सुधारणा व सक्षमीकरण उपक्रमांतर्गत अत्याधुनिक तंत्रज्ञानाने सुसज्ज थ्री टेस्ला मशीन नवी मुंबई महानगरपालिकेने खरेदी केली असून ही सुविधा बाहययंत्रणेव्दारे चालविली जाणार आहे. वाशी रुग्णालयात सुरु होणाऱ्या या एमआरआय सुविधेला मिळणारा प्रतिसाद लक्षात घेऊन इतरही रुग्णालयांमध्ये ही सुविधा सुरु करण्याच्या दृष्टीने कार्यवाही करण्यात येईल असे या पाहणी दौऱ्यादरम्यान आयुक्त डॉ.कैलास शिंदे यांनी सूचित केले.