Breaking News
प्रा.परिवहन विभागाचा अहवाल गुंडाळून निविदाधारकाला 12 कोटींचे काम
नवी मुंबई ः महापालिकेने सायन-पनवेल महामार्गावरील वाशी टोल नाका ते सीबीडी बेलापुर सर्कलपर्यंत पथदिवे दुरुस्ती व पाच वर्षांकरीता देखभाल दुरुस्तीच्या कामाची निविदा काढली होती. हे काम रॉयल पावर टर्नकी या कंपनीला देण्यात आले आहे. सदर कंपनी निविदा अटी व शर्तींची पुर्तता करत नसल्याची तक्रार प्राप्त होऊनही पालिकेने अपात्र ठेकेदाराला 12 कोटींचे काम दिल्याने आश्चर्य व्यक्त होत आहे. एका आमदाराच्या दबावापोटी हा ‘कडू’ निर्णय तत्कालीन पालिका आयुक्त अभिजीत बांगर यांनी घेतल्याची चर्चा पालिकेत आहे.
महानगरपालिकांच्या हद्दीतून जाणारे रस्ते महाराष्ट्र सरकारने संबंधित महानगरपालिकांना हस्तांतरीत केले आहेत. या रस्त्यांची देखभाल दुरुस्ती करण्याचे काम महापालिकांना करायचे असून त्यासाठी ठराविक निधी पालिकेला देण्यात येणार आहे. या पार्श्वभुमीवर नवी मुंबई महानगरपालिकेने सायन-पनवेल महामार्गावरील वाशी टोल नाका ते सीबीडी बेलापुर सर्कल या चेनेजमधील पथदिवे दुरुस्ती व पाच वर्षांकरिता देखभाल दुरुस्तीची निविदा फेब्रुवारी 2022 मध्ये काढली होती.
या महामार्गावरील पथदिव्यांची उंची 14 मीटरची असल्याने पालिकेने निविदेमध्ये प्रत्येक निविदाधारकाला त्याच्याकडे 14 मी. शिडीवाहन असल्याचे पुरावे सोबत सादर करण्याची अट टाकली होती. त्यासाठी संबंधित वाहनाच्या नोंदणी पुस्तकाची छायांकित प्रत तांत्रिक लिफाफ्यात सादर करणे गरजेचे होते. या निविदा प्रक्रियेत चार ठेकेदारांनी भाग घेतला होता. त्यामधून मे. बालाजी असोसिएट्स यांनी 14 मी. शिडीवाहन असल्याचा पुरावा सादर न केल्याने त्यांना अपात्र ठरवण्यात आले. त्याचबरोबर योगीराज पॉवरटेक यांनी निविदा अटीप्रमाणे पथदिवे लावणे आणि कार्यान्वित न केल्याने त्यांना अपात्र करण्यात आले. यामध्ये तिसरे ठेकेदार रॉयल पॉवर टर्नकी, इंप्लीमेंट्स लि. यांनी सादर केलेले 14 मी. शिडीवाहनाचे कागदपत्र हे मुळात शिडीवाहनाचे नसून ते मालवाहतुकीचे असल्याचे समोर आले आहे. त्याचबरोबर चौथे निविदाकार हे निविदा अट क्र.- ‘क’ बीड कॅपॅसिटीची पुर्तता करत नसतानाही त्यांना पात्र करण्यात आले आहे.
वरील चारही निविदाकार या निविदेतील अटी व शर्तींची पुर्तता करत नसतानाही निविदा पुर्णत्वास नेण्यासाठी चौथ्या निविदाकाराला जाणिवपुर्वक पात्र करण्यात आल्याचा आरोप शहर अभियंता विभागावर करण्यात आला आहे. रॉयल पॉवर टर्नकी या कंपनीने शिडीवाहनाचे सादर केलेले कागदपत्र हे निविदा अटींची पुर्तता करत नसल्याचा पुरावा उपपरिवहन अधिकारी पिंपरी चिंचवड पुणे यांनी पालिकेला सादर केला आहे. या पुराव्यात हे वाहन माल वाहतुक वाहन म्हणून नोंदणीकृत आहे.
याबाबत तत्कालीन पालिका आयुक्त अभिजीत बांगर, शहर अभियंता संजय देसाई यांच्याकडे तक्रार प्राप्त होेऊनही त्यांनी सदर कागदपत्रांकडे जाणिवपुर्वक दुर्लक्ष करुन हे काम अपात्र ठेकेदाराला दिले आहे. या कामात मोठी उलाढाल झाल्याची चर्चा पालिकेत असून तत्कालीन पालिका आयुक्तांच्या या ‘अभिजात’ निर्णयाची चौकशी होण्याची मागणी होऊ लागली आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
संजयकुमार सुर्वे