Breaking News
नवी मुंबई : वाशीतील बंद घरांची रेकी करुन घरफोडी करणाऱ्या सराईत आंतरराज्य टोळीला वाशी पोलिसांनी अटक केली. या टोळीने नवी मुंबईसह इतर भागांत केलेले 13 गुन्हे उघडकीस आले असून या गुह्यांतील सुमारे 30 लाख 17 हजार रुपयांचा मुद्देमाल पोलिसांनी हस्तगत केला आहे.
आशीष ऊर्फ सूरज जिलेदार सिंग (वय 32), राजकुमार लालबहादूर सिंग ठाकूर (42), राजकुमार रामकुमार पांचाळ (43) आणि पूजा अंकुश जाधव (वय 32) ही अटक करण्यात आलेली टोळी घरांची अथवा इमारतीची रेकी करत होती. घरात कोणी नसल्याची खात्री झाल्यानंतर पाळत ठेवून घरफोडी करत असल्याचे तपासात आढळून आले आहे. या टोळीने जानेवारीमध्ये वाशी सेक्टर 6 मधील बंद रो-हाऊस फोडून 99 लाख 95 हजार रुपयांचा ऐवज चोरला होता. वाशी पोलिस ठाण्यात घरफोडीचा गुन्हा दाखल झाल्यावर चार संशयितांची माहिती मिळाल्यानंतर पाळत ठेवून त्यांना उत्तर प्रदेश व मध्य प्रदेशातून ताब्यात घेतले. त्यांची चौकशी केली असता, त्यांनी वाशीमधील रो-हाऊसमध्ये घरफोडी केल्याची कबुली दिली .पांचाळ हा मध्यप्रदेशचा असून कोपर खैरणेत रहायला आहे. तो नवी मुंबईत ठिकठिकाणी बंद घरांची रेकी करून एखादा रो हाऊस जास्त दिवस बंद असल्याचे दिसून येताच बाकीच्या साथीदारांना त्याची माहिती देऊन बोलवून घ्यायचा. तर ठरलेल्या ठिकाणी घरफोडी केल्यानंतर सर्वजण पुन्हा त्यांच्या मूळ ठिकाणी निघून जायचे. वाशीतील गुन्ह्याच्या तपासात सहायक निरीक्षक तायडे यांच्या पथकाला तायडे बद्दल माहिती मिळाली असता अधिक तपासात तो सूरज व इतरांच्या संपर्कात असल्याचे समोर आले. त्यानुसार उत्तर प्रदेशमधून सूरजला अटक केल्यानंतर इतर दोघांना पकडण्यात आले.
वाशीतील घरफोडी प्रकरणातील 13 लाख 50 हजारांची रोकड, आठ लाखांचे अमेरिकन डॉलर्स, एक लाख 15 हजारांचे सोन्याचे दागिने असा एकूण 22 लाख 65 हजारांचा ऐवज हस्तगत केला. या आरोपींनी एजाज अब्दुल करीम चौधरी, आनंद राजू पिल्ले ऊर्फ रजवा यांच्यासह चारचाकी गाडीतून येऊन घरफोडी केल्याचे तपासात आढळून आले. अन्य गुह्यांतील साडेसात लाखांचा ऐवज हस्तगत करण्यात आला.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai