ठाण्यात समूह विकास योजनेचा शुभारंभ

ठाण्यात समूह विकास योजनेचा शुभारंभ

by Aajchi Navi Mumbai
Jun 07, 2023
179

1500 हेक्टर जागेवर टप्प्याटप्प्यात योजना

ठाणे : ठाणे शहरातील समूह पुनर्विकास योजनेचे (क्लस्टर) काम सुरु करणे माझे स्वप्न आहे. सुमारे 1500 हेक्टर जमिनीवर वेगवेगळ्या टप्प्यात क्लस्टर प्रकल्प उभारण्यात येणार असून, पहिल्या टप्प्यात सुमारे 10 हजार घरांची निर्मिती होणार आहे. क्लस्टर एक ऐतिहासिक प्रकल्प होणार आहे. ज्या दिवशी या योजनेतील घराची चावी नागरिकांना मिळेल तो दिवस माझ्यासाठी सर्वात परमोच्च आनंदाचा दिवस असेल, असे प्रतिपादन मुख्यमंत्री एकनाथ शिंदे यांनी ठाणे येथे केले.

अनधिकृत आणि अधिकृत धोकादायक इमारतींचा पुर्नविकास करण्यासाठी आखलेल्या ठाणे शहरातील समूह विकास योजनेच्या (क्लस्टर) कामाचा शुभारंभ 5 जून रोजी राज्याचे मुख्यमंत्री एकनाथ शिंदे यांच्या हस्ते झाला. यावेळी मुख्यमंत्री यांच्या सुविध पत्नी लता शिंदे, राज्य उत्पादन शुल्क मंत्री तथा ठाणे जिल्हा पालकमंत्री शंभूराज देसाई, सार्वजनिक बांधकाम (सार्वजनिक उपक्रम वगळून) मंत्री रविंद्र चव्हाण, ठाणे महापालिका आयुक्त अभिजीत बांगर आदी उपस्थित होते. किसन नगर येथील समूह विकास योजनेच्या कामांची सुरुवात 1997 मध्ये पडलेल्या साईराज इमारतींतील रहिवासी दाम्पत्यांच्या हस्ते पूजा करुन करण्यात आली. यावेळी क्लस्टर योजनेच्या लोगोचे अनावरण मुख्यमंत्री एकनाथ शिंदे यांच्या हस्ते झाले.

1997 मध्ये ठाणे शहरातील साईराज इमारत पडल्यानंतर अनधिकृत धोकादायक इमारतींचा प्रश्न मार्गी लावण्यासाठी प्रयत्न सुरु केले. अनधिकृत इमारती या गरजेपोटी बांधल्या होत्या. घरे अनधिकृत असली तरी माणसे तर अधिकृत होती. त्यामुळे या घरांचा प्रश्न मार्गी लावण्यासाठी तेव्हापासून अनेक आंदोलने, संघर्ष केले. आज कित्येक वर्षानंतर क्लस्टर योजनेचे काम सुरु होत आहे. क्लस्टर योजना मार्गी लागण्यासाठी तत्कालीन मुख्यमंत्री तथा सध्याचे उपमुख्यमंत्री देवेंद्र फडणवीस यांच्यासह अनेकांचे सहकार्य लाभले. ठाणे शहरातील क्लस्टर योजनेचे काम आता सुरु झाले असून, इमारती पूर्ण होईपर्यंत ते काम सुरु राहणार आहे. या योजनेत केवळ इमारती उभ्या राहणार नाहीत, तर येथे मोकळी मैदाने, उद्याने, आरोग्याच्या सुविधाही असतील. एक सुनियोजित शहर उभारण्याचे आपले स्वप्न आहे. सिडकोद्वारे बांधण्यात येणाऱ्या घरांच्या दर्जापेक्षाही चांगल्या गुणवत्तेची घरे येथे उभारण्यात येतील. अधिकृत इमारती आणि सध्या सुरु असलेल्या पुनर्विकास योजनेतील इमारतींना क्लस्टर योजनेत समावेश ऐच्छिक ठेवला असून, यासंदर्भात सकारात्मक निर्णय घेण्यात येईल, असे यावेळी मुख्यमंत्री एकनाथ शिंदे यांनी सांगितले.

ठाणे शहराप्रमाणेच मुंबईसह मुंबई महानगर प्रदेशातील मीरा भाईंदर, कल्याण, भिवंडी आदी क्षेत्रातील अनधिकृत धोकादायक इमारतींच्या क्लस्टर योजनेचा मार्ग मोकळा केला आहे. मीरा भाईंदर मधील क्लस्टर योजना दिवाळीनंतर सुरु होईल, असेही मुख्यमंत्री एकनाथ शिंदे यांनी यावेळी जाहीर केले. यावेळी ठाणे महापालिका आयुक्त अभिजीत बांगर यांनी प्रास्ताविकात क्लस्टर योजनेची माहिती दिली. ठाणे शहरात शौचालये दुरुस्ती, सौंदर्यीकरण, रस्ते विकासाची अनेक कामे सुरु आहेत. मुख्यमंत्र्यांचे बदलते ठाणे उपक्रमातून ठाणे शहराचा चेहरा बदलत आहे, असे महापालिका आयुक्त अभिजीत बांगर यांनी यावेळी सांगितले.