कोकण रेल्वे पोलीसांची मोठी कारवाई

कोकण रेल्वे पोलीसांची मोठी कारवाई

by Aajchi Navi Mumbai
Nov 22, 2025
73

50 लाखांचे चोरीचे दागिने जप्त; चार आरोपी अटक

मुंबई ः कोकण रेल्वे संरक्षण दलाने दागिन्यांच्या मोठ्या चोरीचा गुन्हा उघडकीस आणत तब्बल 50 लाख किमतीचे सोन्याचे दागिने आणि 34,500 रु. रोकड असा मुद्देमाल जप्त केला आहे. ही कारवाई संशयित हालचालींची माहिती मिळाल्यानंतर करण्यात आली. या प्रकरणात हरियाणा राज्यातील चार संशयितांना ताब्यात घेण्यात आले आहे.

14 नोव्हेंबर रोजी कोकण रेल्वेला माहिती मिळाली की ज्वेलरी चोरीप्रकरणातील काही संशयित आरोपी मडगावच्या दिशेने प्रवास करत आहेत. रेल्वे संरक्षक दलाच्या त्वरित आणि समन्वयपूर्ण कारवाईमुळे हा गुन्हा वेगाने उघड झाला. एक विशेष पथक तातडीने तयार करण्यात आले. हे पथक समोरच्या आणि मागील जनरल बोगींमध्ये रणनीतीपूर्वक काही टीसीच्या वेशात, काही फेरीवाले म्हणून तर काही प्रवासी म्हणून तैनात करण्यात आले. मडगाव स्टेशनवर (प्लॅटफॉर्म क्रमांक 1) गाडी पोहोचताच पथकाने सर्व चार संशयितांना वेगाने ताब्यात घेतले. पोस्ट मडगाव येथे चौकशीदरम्यान त्यांच्याकडील मुद्देमाल जप्त करण्यात आला. त्यांच्या सामानातून मोठ्या प्रमाणात सोन्याचे दागिने आणि रोकड असल्याचे आढळून आले. या प्रकरणात राजेश राम, मनोज कुमार आणि जितेंद्र सिंह यांच्यासह चौघांना अटक करण्यात आली आहे. या सर्व आरोपींचे मूळ निवासस्थान हरियाणामध्ये असल्याचे पोलिसांनी सांगितले. अंदाजे 50 लाखांचे सोन्याचे दागिने, 34,500रु. रोकड, दोन पॉकेट कटर, चार मोबाईल फोन आणि जप्त केलेला मुद्देमाल 15 नोव्हेंबर रोजी रेल्वे संरक्षक दल- दक्षिण विभाग यांच्याकडे पुढील तपासासाठी हस्तांतरित करण्यात आला. ही कारवाई कोकण रेल्वेच्या प्रवासी सुरक्षेवरील सातत्यपूर्ण बांधिलकीचे प्रतीक आहे. कोकण रेल्वेच्या दक्षतेमुळे प्रवाशांच्या सुरक्षेबाबत लोकांचा विश्वास अधिक दृढ झाला आहे.