Breaking News
नवी मुंबई : फ्लिपकार्टवर बनावट ग्राहकांच्या पत्यावर ऑर्डर देऊन आलेल्या पार्सल मधून वस्तू चोरून त्यात साबण व इतर वस्तू भरून परत पाठवणार्या तिघांना पोलीसांनी अटक केली आहे.पार्सल मधून चोरलेल्या या सर्व वस्तूंचा ते स्वतःसाठी वापर करत होते. अटक केलेल्या तिघांकडून सुमारे 8 लाख 24 हजाराच्या महागड्या वस्तू जप्त केल्या आहेत. तिघेही फ्लिप कार्टचे कर्मचारी आहेत.
ऑनलाईन वस्तू मागवून पत्ता चुकीचा असल्याच्या बहाण्याने पार्सल परत पाठवताना त्यामधील मूळ वस्तूंची चोरी करणारे रॅकेट उघडकीस आले आहे. यासंदर्भात कोपरखैरणे पोलिसांना माहिती मिळाली होती. त्यानुसार वरिष्ठ निरीक्षक प्रदीप तिदार यांच्या मार्गदर्शनाखाली सहायक निरीक्षक निलेश येवले, हवालदार गणपत पवार, गणेश चौधरी, किरण बुधवंत, गणेश गिते, निलेश निकम आदींचे पथक तयार करण्यात आले होते. अधिक चौकशीत हाती आलेल्या माहिती नुसार येवले यांच्या पथकाने घणसोली सेक्टर 1 येथून वाजीद शकील मोमीन (24) याला ताब्यात घेतले होते. चौकशी दरम्यान तो वापरत असलेल्या आयफोनच्या बिलाविषयी पोलिसांनी विचारणा केली असता संपूर्ण प्रकार उघडकीस आला. यानुसार मोमीन याच्यासह संघपाल मोरे (29) व जयंत उगले (27) यांनाही अटक करण्यात आली. तिघेही फ्लिप कार्ट चे कर्मचारी असून त्यापैकी उगले याने वर्षभरापूर्वी नोकरी सोडली आहे. मोमीन हा ऑफलोड टिम लीडर असल्याने चुकीच्या पत्त्यामुळे एखादे पार्सल परत आल्यास त्याची माहिती त्याला असायची. यामुळे त्यानेच पाहिजे असलेल्या वस्तूंची चुकीच्या पत्त्यांवर ऑर्डर करण्यास सुरवात केली. हे पार्सल परत आल्यानंतर ते घरी नेवून त्यातली मूळ वस्तू काढून घेऊन आतमध्ये साबण अथवा इतर वस्तू भरून पार्सल कंपनीला परत पाठवण्यास सुरवात केली होती. मात्र अद्याप पर्यंत हि बाब फ्लिप कार्ट कंपनीच्या निदर्शनास आली नव्हती. मात्र कोपर खैरणे पोलिसांनी या रॅकेटचा उलगडा केल्यानंतर फ्लिपकार्टच्या अधिकार्यांना त्याची माहिती देऊन त्यांच्या तक्रारीद्वारे तिघांवर गुन्हा दाखल करण्यात आला आहे. अटक केलेल्या तिघांकडून सुमारे 8 लाख 24 हजाराच्या महागड्या वस्तू जप्त केल्याचे पोलीस उपायुक्त सुरेश मेंगडे यांनी पत्रकार परिषदेत सांगितले. यावेळी सहायक आयुक्त विनायक वस्त व इतर अधिकारी उपस्थित होते. आरोपींकडून जप्त केलेल्या वस्तूंमध्ये 4 आयफोन तसेच इतर महागडे फोन, आयपॅड, महागडी घड्याळे व कॅमेरे यांचा 25 हुन अधिक वस्तूंचा समावेश आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai