Breaking News
नवी मुंबई : नवी मुंबईतील कोपरखैरणे रेल्वे स्टेशनलगत असलेली झोपडपट्टी महानगरपालिकेने हटवली आहे. ही झोपडपट्टी पदपथावर पसरली होती. सोमवारी सकाळपासून ही कारवाई सुरू करण्यात आली होती. यापुर्वीही या झोपड्यांवर कारवाई करण्यात आली होती. मात्र पुन्हा पुन्हा या झोपड्या वसत असल्याने पालिकेसह पोलिसही हतबल झाले आहेत. या कारवाईसाठीही पोलिसांचा मोठा बंदोबस्त ठेवण्यात आला होता.
कोपरखैरणे रेल्वे स्थानकालगत आणि बालाजी चित्रपटगृहासमोर सेक्टर-9 येथील सिडकोच्या भूखंडावर मोठी झोपडपट्टी उभी करण्यात आली होती. 2018 मध्ये सदर भूखंड सिडकोने विकासकाला विकला मात्र विकासकाने झोपडपट्टी हटवल्याशिवाय ताबा घेणार नाही, असा पवित्रा घेतल्याने सिडकोने मोठी कारवाई करीत झोपड्या हटवल्या आणि तात्काळ विकासकाला भूखंड हस्तांतरण केला. विकासकानेही लगोलग भूखंड सीमेवर तारांचे कुंपण टाकले. त्यामुळे संतप्त झोपडपट्टीवासीयांनी केलेल्या दगडफेकीत पोलीस जखमी झाले होते. त्यानंतर पुन्हा झोपड्यांनी पदपथावर बस्तान मांडले. त्याला मनपाने विरोध केला नाही. मात्र अतिक्रमण विभागात खांदेपालट होताच काही ठोस कारवाई झाल्या आहेत. त्यात याही कारवाईचा समावेश आहे.
या कारवाईसाठी आठही विभाग कार्यालयातील कर्मचाऱ्यांची मदत घेण्यात आली होती. तसेच सुमारे शंभर पोलिसांचा बंदोबस्त ठेवण्यात आला होता. यासाठी 20 ते 25 कामगारांच्या मदतीने दोन जेसीबी मशीनसह सर्व झोपड्या पाडण्यात आल्या. याशिवाय या झोपडपट्टीवासीयांनी हळूहळू सेक्टर-9 रहिवासी गृहसंकुलासमोरील पदपथावर मांडलेली पथारी उद्ध्वस्त करण्यात आली आहे. संध्याकाळपर्यंत पूर्ण जागा मोकळी करण्यात येईल, अशी कोपरखैरणे अतिक्रमण विभागाने माहिती दिली.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai